АҚШда COVID-19 пандемияси 350 мингдан ортиқ кишининг умрига зомин бўлди. Бу ҳақда касаллик тарқалишини реал вақтда кузатиб келаётган Жонс Ҳопкинс университети маълумотлари гувоҳлик бермоқда.
3 январь соат 14:00 ҳолатига кўра, мамлакатда 350 195 та ўлим ҳолати қайд этилган. АҚШ коронавирусдан вафот этганлар сони бўйича дунёда етакчи давлат бўлиб қолмоқда.
Энг кўп ўлимлар Нью-Йорк штатида — 32,2 минг киши. Иккинчи ўринда бўлган Техасда 28,3 минг киши вафот этган. Калифорния қурбонлар сони бўйича учинчи ўринда — 26,5 минг киши.
Бундан бир кун аввал АҚШда коронавирусга чалинганлар сони 20 миллион кишидан ошганди. Янги касалланиш ҳолатларининг энг кўпи Калифорния, Техас, Флорида ва Нью-Йоркда қайд этилган.
Дунёда COVID-19’га чалинганлар сони бўйича иккинчи ўринда — Ҳиндистон (10,3 миллионтадан ортиқ), учинчи ўринда — Бразилия (7,7 миллион). Россия эса 3,1 миллионта касалланиш ҳолати билан тўртинчи ўринда.
АҚШда 14 декабрь куни коронавирусга қарши эмлаш бошланди. Биринчи навбатда касалланганлар билан ишлаётган тиббиёт ходимлари эмланмоқда. Касалликлар назорати ва профилактикаси марказлари (CDC) маълумотларига кўра, 2020 йил охиригача Америка ҳукумати 40 миллион кишини эмлашни режалаштирмоқда.
Американинг Pfizer фармацевтик гиганти билан бирга COVID-19’га қарши вакцина яратган Германиянинг BioNTech биоинжиниринг компанияси раҳбари Угур Шаҳин АҚШда вакцинация жараёни нормал кечган ҳолда 2021 йил ёзи охирига келиб, коронавирус инфекцияси пандемиясини назорат остига олишга муваффақ бўлиш мумкинлигини билдирган.
Бироқ New York Times газетаси маълумотларига кўра, АҚШ аҳолисини коронавирусга қарши эмлаш кампанияси логистика муаммолари туфайли белгиланган муддатдан анча орқада қолмоқда.
Декабрь ойининг бошларида олимлар АҚШда оммавий эмлашларга қарамай, 2021 йилнинг апрель ойига бориб COVID-19 қурбонлари сони 539 минг нафаргача ошиши мумкинлигини тахмин қилганди.
Изоҳ (0)