1976 йилда Эбола вирусини биринчи бўлиб аниқлаган конголик олим, микробиолог Жан-Жак Муембе-Тамфум Конгода ҳаёт учун хавфли бўлган янги касаллик пайдо бўлгани эҳтимолидан огоҳлантирди. Бу ҳақда CNN’га таяниб, «РБК» хабар берди.
Унинг сўзларига кўра, мамлакат ғарбида жойлашган Ингенде шаҳридаги бир аёлда геморрагик иситма белгилари кузатилган. Аёлдан таҳлил олиниб, Киншасадаги биотиббий тадқиқотлар миллий институтига жўнатилганда, унда Эбола вируси ёки тиббиётга маълум бўлган бирорта касаллик белгилари аниқланмаган.
Муембе-Тамфум аёл аввал қайд этилмаган, шартли равишда «Х касаллик» деб атаган янги касалликка чалинган илк бемор бўлиши мумкин, деб тахмин қилмоқда. Олимнинг баҳолашича, янги касаллик COVID-19 каби юқумли бўлиши, ундан ўлим даражаси эса Эбола вирусидагидан 50-90 фоизни ташкил қилиши мумкин (ушбу вирусдан ўртача 50 фоиз касаллар вафот этган).
Айни пайтда номаълум касаллик аниқланган аёл изоляция қилинган, унга яқинлари билан фақат пластик ойна орқали мулоқот қилишга рухсат берилган. Аёл ва унинг яқинларига Эбола билан касалланишдан қўрқадиган маҳаллий аҳоли томонидан зарар етказилмаслиги учун унинг шахси сир сақланмоқда.
Ҳозирча «Х касаллик» гипотезалигича қолмоқда. Шунга қарамай, ЖССТ янги эпидемия юз беришидан жиддий хавотирда.
Аввалроқ Муембе-Тамфум инсоният келажакда ҳайвонлардан одамларга юқувчи янги касалликка дуч келишидан огоҳлантирган. Микробиолог бундай касаллик COVID-19’дан ҳам хавфлироқ пандемияни юзага келтириши мумкинлигини истисно этмаган.
Маълумот учун, Эбола касаллиги биринчи марта 1976 йилда аниқланган. Ушбу вирусли касаллик 2013–2016 йилларда Ғарбий Африкада жуда кенг тарқалиб кетди. Гвинеяда бошланган касаллик Либерия ва Сиерра-Леонега ҳам ўтиб кетди. Касалликнинг ўзига хос хавфли жиҳати унда касалланганлар орасида ўлим ҳолатининг юқорилигидадир. Ўша пайтда 11 315 киши ёки касалларнинг 50 фоизи вафот этган. 2019 йилнинг июль ойида Конго Демократик Республикасида қайд этилганидан кейин ЖССТ халқаро фавқулодда ҳолат эълон қилган. Мамлакатда касаллик пайдо бўлганидан буён 2 200 киши вафот этган.
Эслатиб ўтамиз, 2020 йил февраль ойида Нигериянинг бошқа бир штати Бенуэда номаълум касалликнинг тарқалгани хабар қилинган. Ўшанда 104 киши касалланган, 15 нафар бемор вафот этганди. Маҳаллий шифокорлар бунинг коронавирус эмас, балки бошқа янги касаллик эканини билдирган. Ноябрь ойида эса Нигерияда 15 киши номаълум касалликдан вафот этди.
Мавзуга доир: Сўнгги йигирма йилликнинг энг хавфли эпидемиялари
Изоҳ (0)