Olimlar bahorga borib AQShda COVID-19 qurbonlari soni ikki baravar oshishi mumkinligini taxmin qildi

AQShda ommaviy emlashlarga qaramay, 2021-yilning aprel oyiga borib COVID-19 qurbonlari soni 539 ming nafargacha oshishi mumkin. “RBK”ning yozishicha, Vashington universiteti qoshidagi o‘chov va tahlil tizimlari instituti mutaxassislari shunday xulosaga keldi. Tadqiqot natijalari institut saytida e’lon qilingan.

“2021-yilda aholini ommaviy emlash bizni normal hayotga olib boradi, ammo oldinda bizni hali bir necha qiyin oylar kutmoqda. Biz hushyor bo‘lib, hech bo‘lmaganda, aprelga qadar o‘zimizni virusdan himoya qilishimiz kerak”, — degan institut rahbari Kristofer Myurrey. Uning fikricha, aprel oyida ommaviy emlashning dastlabki natijasi ko‘rinadi.

Shu bilan birga, tadqiqotga ko‘ra, agar vaksina aholiga olimlar taxmin qilganidan tezroq yetkazilsa, COVID-19 qurbonlari soni 528 ming kishigacha kamayishi mumkin. Agar ommaviy emlash mutaxassislarning taxmin qilganidek kechadigan bo‘lsa, ammo aholining 95 foizi niqob taqsa, o‘limlar soni 473 ming kishigacha kamayadi. Agar niqob taqish rejimiga rioya qilinmasa, hatto emlash boshlanganiga qaramay, aprel oyiga kelib amerikaliklarning qariyb 770 ming nafari o‘lishi mumkin.

Jons Hopkins ma’lumotlariga ko‘ra, AQShda har kuni COVID-19’dan 2 mingdan ortiq kishi vafot etmoqda. 5-dekabr holatiga ko‘ra, mamlakatda bir sutkada 2607 kishi vafot etdi. Mamlakatda jami 14,6 milliondan ortiq kasallanish holatlaridan 281 mingdan ortig‘i o‘lim bilan yakunlangani qayd etilgan. Shunday qilib, AQSh COVID-19’ga chalinganlar soni bo‘yicha ham, undan vafot etganlar soni bo‘yicha ham dunyoda yetakchilik qilmoqda.