Коронавирусга чалиниб тузалганлар ҳам унинг дастлаб Буюк Британияда аниқланган янги штаммини юқтириб олиши мумкин. Бу ҳақда Жорж Мэйсон университетининг тизимли биология мактаби профессори Анча Баранова маълум қилди, деб хабар бермоқда «РБК» «РИА Новости»га таяниб.

Фото: Getty Images

Ҳа, улар қайта юқтиришдан тўлиқ ҳимояланмаган бўлиши мумкин. Бу уларнинг қонида ишлаб чиқарилган антитаналарнинг турига боғлиқ», — дея огоҳлантирган мутахассис.

Буюк Британия Соғлиқни сақлаш вазирлиги коронавируснинг янги тури аниқлангани ҳақида 14 декабрь куни маълум қилган эди. Англия бош санитар шифокори Крис Уитти бу турдаги вирус «одатий» SARS-CoV-2’дан кўра тезроқ тарқалаётганини қайд этган. Мамлакат бош вазири Борис Жонсоннинг сўзларига кўра, коронавируснинг янги генетик варианти 70 фоизга юқумлироқ бўлиши мумкин.

Инфекциянинг янги штамми аниқлангани муносабати билан Англия жануби-шарқида, хусусан, Лондонда 20 декабрдан эътиборан чекловларнинг юқори, тўртинчи даражаси жорий этилди. Кейинчалик коронавируснинг янги штамми Буюк Британиянинг турли ҳудудларида, шу жумладан, яқинда чекловларнинг энг қатъий тўртинчи даражаси жорий қилинган ҳудудлар ташқарисида ҳам аниқланди.

ЖССТ 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Ҳозирда ташкилот бу штаммни ўрганмоқда. Ушбу штамм Франция ва Японияда ҳам қайд этилди, Германия ва Швейцарияда ҳам коронавируснинг «британча штамми», Нигерияда эса бутунлай янги мутацияси аниқланди. Жанубий Корея ва Иорданияда ҳам ушбу штамм билан касалланганлар аниқланди. уларнинг барчаси аввалроқ Британияда бўлиб қайтган.

Шу муносабат билан 20 дан ортиқ мамлакат Буюк Британия билан авиақатновларга чекловлар киритди, шу жумладан Ўзбекистон ҳам.