Арманистон бош вазири Никол Пашинян фикрича, агар Озарбайжон Арманистоннинг Сюник вилоятига таҳдид соладиган бўлса, Россия бунга аралашади. Бу ҳақда «Коммерсантъ» хабар бермоқда.
Ҳудуд аҳолиси Тоғли Қорабоғ ерларининг бир қисми Боку назорати остига ўтганидан кейин у ерга Озарбайжоннинг янги ҳарбий постлари жойлаштирилиши уларнинг хавфсизлигига таҳдид солишидан хавотир олмоқда.
«Энг асосий масала — хавфсизликни таъминлаш… (Чегарадаги) ҳаракатлар натижасида Сюникдаги урушнинг олди олинди. Нафақат бугун, балки умуман ҳам, чунки биз ҳозир шундай жойлашганмизки, Сюникка нисбатан тажовузкорлик юз берган тақдирда, нафақат Арманистон қуролли кучлари, балки Россия ҳам аралашади. Бу фақат шунинг учун қилинган», — деди Пашинян «Арманистон жамоатчилик телевидениеси»га берган интервьюсида. Бош вазирнинг сўзларига кўра, айни пайтда 20 га яқин ер участкалари бўйича чегара масалалари муҳокама қилинмоқда.
Сюник вилоятида Тоғли Қорабоғда урушни тўхтатиш ҳақидаги, ерларнинг бир қисмини Озарбайжонга беришни кўзда тутувчи келишув туфайли норозиликлар бўлиб ўтмоқда. 21 декабрь куни намойишчилар Пашиняннинг ташрифига халақит берди — улар трассани тўсиб қўйди. Аввалроқ Озарбайжон ҳарбий нуқталари вилоятдаги аҳоли пунктларидан 70 ва 100 км узоқликда жойлашган бўлса, келишувдан кейин энди чегара аҳоли пунктларидан бир неча метр масофада жойлашмоқда.
Аввалроқ Арманистон бош вазири Никол Пашинян агар халқ унинг истеъфосини хоҳлаётган бўлса, истеъфога чиқишга тайёрлигини маълум қилган эди.
Эслатиб ўтамиз, Россия иштирокидаги музокаралар натижасига кўра, низо томонлари ўт очишни тўхтатишга қарор қилди. 10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади.
Сулҳ шартлари Келбажар, Агдам, Лачин туманлари ва Газах туманида Арманистон томони эгаллаб турган ҳудудлар Озарбайжон назорати остига берилишини назарда тутади.
Баҳсли ҳудудга 2 мингга яқин Россия тинчликпарварлари киритилади, улар ўт очишни тўхтатиш режимига риоя қилинишини назорат қилади. Шунингдек, томонлар асирлар, марҳумларнинг жасадларини айирбошлашни бошлайди ва минтақада транспорт қатновини қайта тиклайди.
Изоҳ (0)