Россия аҳолисининг ярмидан кўпроғи (58 фоизи) Россиянинг «Спутник V» вакцинаси билан коронавирусга қарши эмланишга тайёр эмас, яна 38 фоизи эса, аксинча, бунга тайёр. Бу ҳақда «Левада-марказ» ўтказган сўров натижаларига таяниб, Meduza хабар бермоқда.
Бу маълумотларни «Левада-марказ» томонидан сўнгги тўрт ой мобайнида ўтказилган шунга ўхшаш сўровлар якунларига қиёслаш мумкин. Масалан, августда респондентларнинг 54 фоизи бу вакцинани олишга тайёр эмасликларини билдирган бўлса, 38 фоизи эмланишга шайлигини маълум қилган эди. Октябрда эса шу икки хил фикрни билдирганлар улуши тегишли равишда 59 ва 36 фоиз бўлган.
Янги сўров натижаларига қараганда, эмланишга тайёр бўлмаганларнинг 30 фоизи вакцина синовларининг якунланишини кутмоқчи, тахминан яна шунча одам (29 фоиз) иккиламчи таъсирлардан хавфсирамоқда, 12 фоиз одамга эса вакцина тиббий жиҳатдан тўғри келмайди. Респондентларнинг яна 12 фоизи коронавирусдан эмланиш қандайдир фойда беришига шубҳа қилади, 10 фоизи — умуман ҳар қандай вакциналарга қарши чиқади. 6 фоиз одам бошқа вариантларни танлаган, 1 фоизи эса жавоб беришга қийналган.
«Левада-марказ» сўрови маълумотларига кўра, сўров қатнашчиларининг 57 фоизи коронавирусга чалинишдан қўрқади, 41 фоизи, аксинча, бундан қўрқмайди. Бу ҳам аввалги сўров якунларига жуда ўхшаш. Чунончи, июлда 49 фоиз одам COVID-19’дан қўрқишини билдирган, яна шунча қисми бундан ҳайиқмаслигини қайд этган.
Эслатиб ўтамиз, 2 декабрда Путин Россияда коронавирусга қарши кенг кўламли эмлашни бошлашни буюрганди. Москвада эмлаш марказлари 5 декабрдан иш бошлади, 17 декабрга қадар, Москва мэри Сергей Собяниннинг сўзларига кўра, 15 мингга яқин киши эмланди. Сергей Собянин шаҳар аҳолисининг 7 миллион нафари COVID-19’га қарши эмланиши кераклигини айтганди.
Вакцинани қабул қилиш имкониятига дастлаб таълим, соғлиқни сақлаш ва ижтимоий соҳа ходимлари эга бўлганди. 14 декабрдан COVID-19’га қарши вакцина олиши мумкин бўлганлар рўйхати кенгайтирилди.
Декабрь ойи ўрталарида Россиянинг барча ҳудудларида коронавирусга қарши эмлаш бошланди.
Россияда иккита вакцина рўйхатдан ўтказилган: Гамалея маркази томонидан ишлаб чиқилган «Спутник V» ва Новосибирскнинг «Вектор» маркази томонидан яратилган «ЭпиВакКорона». Ҳар иккала препарат учинчи синов босқичида ва у ҳали давом этмоқда. «Спутник V» ишлаб чиқарувчилар унинг 95 фоиз самарадорлигини маълум қилган.
Изоҳ (0)