Коронавирус пандемияси янги Ford Bronco’ни ишлаб чиқариш жараёнининг сурилишига олиб келди, бироқ компания харидорлар олдида юзага келган ноқулайликни компенсация қилиб беришга тайёр, деб хабар қилади Motor.
Ушбу моделга талаб юқори бўлганлигига қарамай, Ford коронавирус пандемияси оқибатида етказиб берувчиларда кузатилган логистик муаммолар сабаб Bronco’нинг тақдимотини кечиктирган эди. Натижада йўлтанламаснинг илк партиялари кейинги йилнинг ёзидан сотувга чиқади. Бу каби кечикиш янги Bronco’нинг барча харидорларига тааллуқли ҳисобланади. Айниқса, Sasquatch пакетига эга «механика» машина харидорларига — улар конвейрдан 2021 йилнинг охирига бориб чиқиши кутилмоқда.
Torque News нашрининг маълум қилишича, Ford компенсация сифатида янги Bronco харидорларига яна 100 доллардан совға қилади — улар ушбу пулни аксессуарларга, техник хизматга ёки йўлтанламаснинг Ford Pass дастури доирасидаги бошқа хизматларига сарфлаши мумкин. Автомобилларни етказиб бериш вақтида мижозлар сабр билан кутгани учун 200 доллардан олади — шундай қилиб, якуний компенсация миқдори 300 долларни ташкил этмоқда. Bronco Sport кроссоверлари харидорларига ушбу муаммо тааллуқли эмас — модель октябрь ойидан бошлаб ишлаб чиқарилмоқда.
Аввалроқ Ford компанияси экстремал шароитларда янги Bronco моделини синовдан ўтказгани тўғрисида хабар берилганди. Йўлтанламас янги авлоди саҳродаги энг экстремал маршрут Moab— Hell’s Revenge бўйлаб ҳаракатланган.
Изоҳ (0)