Ўзбекистон товар-хом ашё биржасида Аи-80 маркали бензин нархи тушди

Ўзбекистон товар-хом ашё биржасида 14—20 декабрь кунлари ўтказилган савдоларда Аи-80 маркали бензин нархи бироз тушди, дея хабар қилмоқда биржа ахборот хизмати.

Қайд этилишича, биржа савдоларига 23 952 тонна Аи-80 маркали автомобиль бензини қўйилган ва улардан 21 736,1 тоннаси, яъни 90,7 фоизи сотилган. Ўтказилган савдоларда ҳар куни ўртача 47 харидор иштирок этган.

Кўриб чиқилаётган даврда Аи-80 маркали автомобиль бензинининг ўртача кунлик нархи маҳсулотнинг бир тоннаси учун 5845,8 минг сўмдан 5 727,9 минг сўмгача ёки 2 фоизга пасайди.

Шунингдек, ушбу даврда Аи-80 русумли автомобиль бензинининг ўртача ҳафталик котировкаси 5787,5 минг сўмни, Аи-91 маркали бензинники эса 6759,4 минг сўмни ташкил этди.

Аввалроқ Энергетика вазирлиги Ўзбекистонда бензин нархлари билан нима содир бўлаётганига тушунтириш берганди.

Эслатиб ўтамиз, 2020 йилнинг 1 майидан бошлаб хўжалик юритувчи субъектлар, жумладан, АЁҚШлар бензинни биржа савдолари орқали сотиб олмоқда, бензин нархлари турли автомобилларга ёқилғи қуйиш шохобчаларида фарқ қилиши мумкин, чунки бу у ҳар бир АЁҚШ томонидан қанчага сотиб олинганига боғлиқ.

Маълумот учун, 7–14 декабрь куни ўтказилган биржа савдоларида Аи-80 маркали автомобиль бензинининг ўртача бошланғич нархи 2,6 фоизга кўтарилганди.