Bentley Mulliner ательеси «жаҳон кўламидаги юлдузи»нинг буюртмасига асосан Flying Spur V8 седанининг махсус версиясини тақдим этди. Мижознинг исми ошкор этилмаган, бироқ капотдаги буғулар тасвири ва «қулоқсиз болалар рўйхати» навигациясидан гап Санта-Клаус ҳақида кетаётганини англаш қийин эмас, деб хабар беради Motor.
Bentley Flying Spur V8 махсус версияси Санта-Клауснинг чанасини тортувчи буғулар шарафига Reindeer Eight номини олган. Седан Cricket Bauble «металлик» рангига бўялган. Кузовнинг остки қисмига градиентли геометрик нақшлар туширилган.
Flying B’нинг одатдаги шакли ўрнига, машина капотини 3D-принтерда чоп этилган тилларанг буғу безаб туради. Қимматбаҳо металл билан капотдаги ҳошиялар ва олд қанотдаги «жабралар» ҳам безатилган, Reindeer Eight эмблемаси эса олд ғилдираклар ёнида жойлашган. Ён томонидаги ингичка чизиқлар эса қўлда туширилган.
Машина эгаси йил охирига қадар 41 миллион миль (66 миллион километрга яқин) йўл босиши керак, шу сабабли Mulliner машина аэродинамикаси устида ишлаган. Седаннинг олд ва орқа томонларига углерод пластикдан ишланган диффузорлар ўрнатилган. Тилларанг 22 дюймли ғилдиракларга барча мавсумларга хос шиналар «кийдирилган». Байрам машинасининг салонини оддий ва Cricket Bauble 3D-чарм ранги безаб турибди.
Reindeer Eight ўриндиқлари узоқ сафарлар вақтида максимал қулайликни тақдим этиши керак. Улар иситгич, вентиляция, ён ва бурчак ёстиқчаларини бошқаргич билан жиҳозланган. Ўриндиқлардаги хоч шаклини тикишга 18 соат вақт, 11 100 индивидуал чок ва 115 метр ип кетган, бу Елизавета минораси (собиқ Биг Бен) баландлигига эквивалент ҳисобланади.
Машинанинг техник жиҳати ўзгартирилгани ҳақида ҳеч қандай маълумот йўқ, шу сабабли Bentley Flying Spur V8 Reindeer Eight капоти остида 550 от кучига эга (700 Нм) 4,0 литрли V8 битурбомотори ўрин олган. Унинг ёрдамида седан соатига юз километр тезликка 4,1 сонияда эришади, максимал тезлиги — 318 км/соат.
Аввалроқ Bentley 90 йиллик спорткарининг аниқ нусхасини яратгани тўғрисида хабар берилганди.
Изоҳ (0)