«Роспотребнадзор» раҳбари баҳорда COVID-19 пандемияси тугашини тахмин қилди

Коронавирус пандемияси баҳоргача тугайди, деб тахмин қилмоқда «Роспотребнадзор» раҳбари Анна Попова. Бу ҳақда «Интерфакс» маълум қилди.

«Пандемия баҳорга қадар тугайди. Агар биз ҳаракат қилсак, ундан ҳам аввал тугаши мумкин. Бу ҳаммамизга боғлиқ», – деди у «Россия 1» телеканалида.

Попова, шунингдек, коронавирусга чалинганларда антитаналар мавжуд бўлса, уларни эмлаш шарт эмаслигини таъкидлади.

«Бугунги кунда эмлашдан олдин одатда антитаналарнинг мавжудлигини текшириб кўрамиз, агар антитаналар бўлса, эмлаш шарт эмас», – деди Попова.

Маълумот учун, пандемия бошланганидан бери мамлакатда коронавирусга чалинганларнинг умумий сони 2 миллион 819 минг 429 кишига етди. Беморларнинг жами 2 миллион 254 минг 742 нафари касалликдан тузалди.

Эслатиб ўтамиз, 2 декабрда Путин Россияда коронавирусга қарши кенг кўламли эмлашни бошлашни буюрганди. Москвада эмлаш марказлари 5 декабрдан иш бошлади, 17 декабрга қадар, Москва мэри Сергей Собяниннинг сўзларига кўра, 15 мингга яқин киши эмланди. Сергей Собянин шаҳар аҳолисининг 7 миллион нафари COVID-19’га қарши эмланиши кераклигини айтганди.

Вакцинани қабул қилиш имкониятига дастлаб таълим, соғлиқни сақлаш ва ижтимоий соҳа ходимлари эга бўлганди. 14 декабрдан COVID-19’га қарши вакцина олиши мумкин бўлганлар рўйхати кенгайтирилди. Декабрь ойи ўрталарида Россиянинг барча ҳудудларида коронавирусга қарши эмлаш бошланди.

Аввалроқ дунёда коронавирусга чалинганлар сони 74 миллион кишидан ошгани ҳақида хабар берилганди.