Қозоғистонда кўнгиллиларни коронавирусига қарши маҳаллий QazCovid-in вакцинаси билан эмлаш бошланди, дея хабар қилмоқда мамлакат бош вазири матбуот хизматига таяниб, «Korrespondent.net».
«Бугунги кунга қадар Биологик хавфсизлик муаммолари илмий-тадқиқот институти томонидан маҳаллий QazCovid-in вакцинасининг I ва II босқич клиник синовлари ўтказилди. Соғлиқни сақлаш вазирлиги якуний, уч минг нафар кўнгилли қатнашадиган III босқич клиник синовларини бошлашни тасдиқлади.
19 декабрь куни дастлабки кўнгиллилар Олмаота ва Тараз шаҳарларидаги илмий-тадқиқот институтларида ҳамда клиникаларда маҳаллий вакцина билан эмланди», – дейилади бош вазирнинг веб-сайтида.
Қайд этилишича, 2020 йилнинг декабрь ойи охирига қадар уч минг кўнгиллини эмлаш ишлари якунланади. III босқич учун 10 минг дозада зарур вакцина партияси ишлаб чиқарилади.
Эслатиб ўтамиз, сентябрь ўрталарида Қозоғистонда QazCovid-in вакцинасининг клиник синовлари бошланганди. Қозоғистон таълим ва фан вазири мамлакатда ишлаб чиқилган ушбу вакцинани ўзида синаб кўрганини маълум қилган.
Изоҳ (0)