18 декабрь куни Мустақил Давлатлар Ҳамдўстлиги давлат раҳбарлари кенгашининг видеоанжуман шаклидаги бўлиб ўтган мажлисида Қирғизистон президенти вазифасини бажарувчи Талант Мамитов коронавирус қарши курашда ёрдам кўрсатган Россия, Қозоғистон ва Ўзбекистон раҳбарларига миннатдорчилик билдирди. Мамитовнинг нутқи Қирғизистон президенти сайтида эълон қилинган.
«Ўзбекистон тарафига Қирғизистонда иккита модул юқумли касалликлар шифохонасини қурилганлиги муносабати билан алоҳида миннатдорлик билдирмоқчиман. Шунингдек, Россия томонидан коронавирусга қарши бир нечта вакцина яратилганини ҳам таъкидлаб ўтишни истардим ва Владимир Владимировични бутун инсоният учун муҳим бўлган мазкур воқеа билан табриклайман», — дейди Мамитов.
Шунингдек, у МДҲнинг келажаги — биринчи навбатда Ҳамдўстлик доирасидаги барқарорлик, хавфсизлик ва яхши қўшничилик алоқалари эканлигини таъкидлаган.
Эслатиб ўтамиз, Қирғизистон президенти вазифасини бажарувчи Садир Жапаров ноябрь ойида давлат раҳбари сайловларида қатнашиш учун ўз ваколатларини бўйнидан соқит қилган. Республика Конституциясига мувофиқ, президент вазифасини парламент спикери Талант Мамитов бажариб туради.
Маълумот учун, МДҲ давлат раҳбарлари кенгашининг видеоанжуман шаклидаги мажлисига бу сафар Ўзбекистон Президенти Шавкат Мирзиёев раислик қилди. Саммит ишида Беларусь президенти Александр Лукашенко, Молдова президенти Игор Додон, Озарбайжон президенти Илҳом Алиев, Россия президенти Владимир Путин, Тожикистон президенти Эмомали Раҳмон, Туркманистон президенти Гурбангули Бердимуҳамедов, Қозоғистон президенти Қосим-Жўмарт Тўқаев, Қирғизистон президенти вазифасини бажарувчиси Талант Мамитов, МДҲ Ижроия қўмитаси раиси – ижрочи котиби Сергей Лебедев ва Ҳамдўстлик парламентлараро ассамблеяси кенгаши раиси Валентина Матвиенко иштирок этган.
Изоҳ (0)