Qirg‘iziston prezidenti vazifasini bajaruvchi Talant Mamitov koronavirusga qarshi kurashda ko‘rsatgan yordami uchun O‘zbekiston tomoniga minnatdorlik bildirdi

18-dekabr kuni Mustaqil Davlatlar Hamdo‘stligi davlat rahbarlari kengashining videoanjuman shaklidagi bo‘lib o‘tgan majlisida Qirg‘iziston prezidenti vazifasini bajaruvchi Talant Mamitov koronavirus qarshi kurashda yordam ko‘rsatgan Rossiya, Qozog‘iston va O‘zbekiston rahbarlariga minnatdorchilik bildirdi. Mamitovning nutqi Qirg‘iziston prezidenti saytida e’lon qilingan.

“O‘zbekiston tarafiga Qirg‘izistonda ikkita modul yuqumli kasalliklar shifoxonasini qurilganligi munosabati bilan alohida minnatdorlik bildirmoqchiman. Shuningdek, Rossiya tomonidan koronavirusga qarshi bir nechta vaksina yaratilganini ham ta’kidlab o‘tishni istardim va Vladimir Vladimirovichni butun insoniyat uchun muhim bo‘lgan mazkur voqea bilan tabriklayman…”, — deydi Mamitov.

Shuningdek, u MDHning kelajagi — birinchi navbatda Hamdo‘stlik doirasidagi barqarorlik, xavfsizlik va yaxshi qo‘shnichilik aloqalari ekanligini ta’kidlagan.

Eslatib o‘tamiz, Qirg‘iziston prezidenti vazifasini bajaruvchi Sadir Japarov noyabr oyida davlat rahbari saylovlarida qatnashish uchun o‘z vakolatlarini bo‘ynidan soqit qilgan. Respublika Konstitutsiyasiga muvofiq, prezident vazifasini parlament spikeri Talant Mamitov bajarib turadi.

Ma’lumot uchun,  MDH davlat rahbarlari kengashining videoanjuman shaklidagi majlisiga bu safar O‘zbekiston Prezidenti Shavkat Mirziyoyev raislik qildi. Sammit ishida Belarus prezidenti Aleksandr Lukashenko, Moldova prezidenti Igor Dodon, Ozarbayjon prezidenti Ilhom Aliyev, Rossiya prezidenti Vladimir Putin, Tojikiston prezidenti Emomali Rahmon, Turkmaniston prezidenti Gurbanguli Berdimuhamedov, Qozog‘iston prezidenti Qosim-Jo‘mart To‘qayev, Qirg‘iziston prezidenti vazifasini bajaruvchisi Talant Mamitov, MDH Ijroiya qo‘mitasi raisi – ijrochi kotibi Sergey Lebedev va Hamdo‘stlik parlamentlararo assambleyasi kengashi raisi Valentina Matviyenko ishtirok etgan.