АҚШ вице-президенти Майк Пенс омма олдида коронавирусга қарши эмланди. Жараён 18 декабрь куни Америка телеканаллари орқали жонли эфирда намойиш этилди. Бу ҳақда «Korrespondent.net» хабар берди.
Майк Пенс билан бирга унинг рафиқаси Карен ва АҚШнинг бош жарроҳи Жером Адамс ҳам вакцина қабул қилди. Уларнинг учаласи ҳам Pfizer ва BioNTech компаниялари томонидан ишлаб чиқарилган вакцинани олган.
Улар журналистлар бўлган хонадаги стулларга ўтирган. Дастлаб шифокор улардан шу вақтгача уларда вакциналардан аллергик реакция бўлмаганини тасдиқлашни сўраган, шунингдек, уларга вакцина ҳақидаги барча маълумотлар тушунтирилган.
Қисқа сўровдан кейин чап елкага укол қилинган, шундан сўнг шифокор бу эмлашнинг биринчи қисми эканлиги, бироз вақт қўл оғриши мумкинлиги ва 21 кундан кейин иккинчи укол учун келиш кераклиги ҳақида огоҳлантирган. Барча жараён бир неча дақиқани олган.
«Мен ҳеч нарсани сезмадим. Яхши қилинди. Сизнинг мамлакат учун хизматингизни қадрлайман», — дея Пенс шифокорларга миннатдорлик билдирди.
Пенснинг сўзларига кўра, у рафиқаси билан «коронавирусга қарши хавфсиз ва самарали вакцина» билан эмланиш учун намуна кўрсатганидан хурсанд.
«Бу ҳафта коронавирус пандемияси якунининг боши бўлиши билан тарихда қолишига ишонаман», — дея қўшимча қилган Пенс.
Эслатиб ўтамиз, АҚШда коронавирусга қарши эмлаш 14 декабрь куни бошланди.
Изоҳ (0)