АҚШ Озиқ-овқатлар ва дорилар сифати бўйича бошқармаси (FDA) экспертлари бошқармага Американинг Moderna компанияси томонидан ишлаб чиқарилган коронавирусга қарши вакцинани маъқуллашни тавсия этди. Бу ҳақда «РБК» хабар бермоқда.
FDA экспертлари хулосасига кўра, Moderna вакцинасининг афзалликлари унинг камчиликларидан устун келади. Дори COVID-19’га нисбатан 94 фоизлик ҳимояни таъминлашга қодир.
12 декабрь куни АҚШ Озиқ-овқат маҳсулотлари ва дори воситаларини назорат қилиш бошқармаси (FDA) Pfizer ва BioNTech компаниялари томонидан яратилган коронавирусга қарши вакциналардан фойдаланишга рухсат берди. Бу АҚШда маъқулланган биринчи вакцина бўлди.
АҚШ президенти Дональд Трамп вакцинанинг биринчи дозасини юбориш ишлари «24 соатдан камроқ вақт ичида» амалга оширилишини маълум қилди.
Кейинроқ Оқ уй қошидаги Миллий хавфсизлик кенгаши матбуот хизмати вакили Жон Эллиот АҚШда COVID-19 коронавирус инфекциясига қарши вакцина билан биринчи навбатда эмланадиганлар гуруҳига юқори даражали мансабдорлар, шу жумладан, Оқ уйнинг баъзи вакиллари ҳам киришини маълум қилди.
Аммо Дональд Трамп ўз Twitter’ида ҳозирча COVID-19’га қарши вакцина олишни режалаштирмаётганини маълум қилди. «Оқ уйда ишлайдиган одамлар вакцинация дастури доирасида сал кейинроқ эмланиши керак, агар бунга алоҳида эҳтиёж бўлмаса. Мен шундай тузатиш киритишни сўрадим», — деб ёзди Америка етакчиси. Трамп аниқлик киритишича, унинг ўзи ҳозирча вакцина олмайди, аммо вақти келганида эмланиш имкониятини «интиқлик билан кутади».
АҚШда 14 декабрь куни коронавирусга қарши эмлаш бошланди. Касалликлар назорати ва профилактикаси марказлари (CДC) маълумотларига кўра, 2020 йил охиригача Америка ҳукумати 40 миллион кишини эмлашни режалаштирмоқда.
1 декабрь куни Moderna АҚШ Озиқ-овқат маҳсулотлари ва дори воситаларининг Санитар назорати бошқармасига (FDA) коронавирус вакцинасидан фавқулодда фойдаланиш учун ариза юборганини эълон қилганди. Аввалроқ унинг самарадорлиги дастлабки таҳлилда 94,1 фоиз, касалликнинг оғир шаклида эса 100 фоиз самарадорлик кўрсатгани маълум қилинганди.
Шу пайтгача АҚШда 17,1 миллион киши коронавирусга чалинган, 310,4 мингдан ортиқ одам вафот этган. АҚШ касалланганлар ва ўлим ҳолатлари сони бўйича ҳамон етакчилик қилмоқда.
Мавзуга доир:
Изоҳ (0)