Швеция қироли Карл XVI Густав мамлакатнинг коронавирусга қарши кураш йўли муваффақиятсиз бўлганини тан олди, деб хабар бермоқда Meduza. Унинг сўзлари Financial Times томонидан келтирилган.
«Менимча, биз муваффақиятсизликка учрадик. Бизда вафот этганлар кўп бўлди ва бу даҳшатли», — деди Карл Густав шведларга қарата мурожаатида.
Унинг айтишича, кескин чоралар кўришдан воз кечиш Швецияда қўшни мамлакатларга қараганда инфекциядан ўлимлар сонининг кўп бўлишига олиб келди.
Швеция бошқа мамлакатлардан фарқли равишда COVID-19 эпидемияси авжида кескин карантин жорий этмаганди. Хусусан, мамлакатда мактаблар, ресторанлар ва спорт заллари ёпилмади.
Жонс Ҳопкинс университети маълумотларига кўра, 17 декабрь ҳолатига кўра, Швецияда 357,5 минг киши коронавирусга чалингани қайд этилган. Эпидемия даврида 9893 киши вафот этган.
Таққослаш учун, Данияда 124 минг кишида COVID-19 аниқланган, расмий маълумотларга кўра 992 киши вафот этган. Норвегияда касалланиш бўйича 42,3 та ҳолат аниқланган, уларнинг 402 таси ўлим билан якунланган.
Аввалроқ Швеция бош вазири мамлакат расмийлари COVID-19 таҳдидини паст баҳолаганини тан олгани ҳақида хабар берилган эди. Мамлакат бош эпидемиологи Андерс Тегнелл карантиндан воз кечилгани сабабли мамлакатда жуда кўп одам вафот этганини тан олган ва буни хато деб атаганди.
Мавзуга доир: Швецияда қатъий карантин жорий қилинади
Изоҳ (0)