Испания полицияси рус мафиясининг пулларини «ювиш» иши бўйича бир нечта россиялик бизнесменни қўлга олган. Улар орасида тадбиркор Алексей Широков (ёки Сироков) ҳам бор, деб ёзади Meduza Испаниянинг El Pais ва АBC газеталарига таяниб.
Нашрларнинг таърифлашича, Широков турли ноқонуний юридик хизматларни кўрсатган, масалан, у Испанияда истиқомат учун гувоҳнома олиш жараёнини соддалаштиришга ёрдам берган.
Широков билан биргаликда яна 22 киши қўлга олинган, булар россиялик бизнесменлар, уларнинг маслаҳатчилари ва бизнес-шериклари, шунингдек, испаниялик мансабдорлар, икки полициячи ва ҳуқуқшунослардир.
АBC газетаси рус мафиясининг пулларини «ювиш»га алоқадор бўлган яна тўрт россияликнинг фамилияларини келтириб ўтди. Булар, нашр маълумотларига кўра, жиноий гуруҳга янги аъзоларни жалб қилиш ва испаниялик бизнесменлар билан музокараларда воситачилик қилган Митюрев; «пул ювиш» учун масъул бўлган Хакимов ва Жижин; мафия билан тўғридан-тўғри мулоқот қилган Данилов. Данилов жиноий ишнинг асосий фигурантларидан бири бўлиб, у ҳозирча қўлга олинмаган.
Испания полицияси Европол билан биргаликда 16 декабрь куни рус мафиясининг жиноий фаолиятдан олинган даромадларини «ювиш»да гумон қилиб, 23 кишини қўлга олди. Улар орасида 8 нафар Россия фуқароси, икки украиналик, Қозоғистон ва Жазоирдан бир нафардан фуқаро ҳамда 11 нафар испаниялик бор. Тинтувларда полиция қурол-яроғ, 300 минг евро нақд пул, бриллиантлар, 16 та қимматбаҳо автомобиль ва криптовалюта ҳисобларини топган. Шунингдек, банк ҳисоблари ва миллионлаб евро қийматга эга активлар полиция томонидан хатланган.
2018 йил октябрида Испанияда Тамбов—Малишев ташкилий жиноятчилик гуруҳи аъзолари деб ҳисобланилган, асосан Россия фуқароларидан иборат 17 киши оқланган эди. Улар Испаниядаги компаниялар ва кўчмас мулклар орқали «пул ювиш»да айбланган эди. Испания миллий суд ҳайъати прокуратура судланувчилар ушбу ташкилий жиноятчилик гуруҳига алоқадор эканлиги ёки «пул ювиш» орқали унга ёрдам бергани юзасидан етарлича далил тақдим этилмаган деб ҳисоблади. Иш бўйича оқланганлар орасида Россия Давлат думаси депутати Владислав Резник ҳам бўлган.
Изоҳ (0)