АҚШнинг Калифорния штатида яшовчи Дениел Ким Фуллертон шаҳридаги Сен-Жуд тиббий марказидан касалхона ходимларининг олқишлари остида чиқди. 49 ёшли эркак бу ерга августда COVID-19 ташхиси билан ётқизилган эди, деб ёзади Yahoo! News.
Дениел касалхонада коронавирусга чалинган бемор учун энг узоқ муддат — беш ой ётди, шундан икки ойини сунъий нафас олдириш аппаратига уланган ҳолда, яъни сунъий кома ҳолатида ўтказди. Аммо юришга ёрдам берувчи махсус восита ва кислород баллони ёрдамида бўлса ҳам, ниҳоят у уйига қайтди.
«Комадан чиққанимдан кейин, касалхонадан бундай чиқиб кета оламан, деб ҳеч ўйламаган эдим, лекин биласизми, бугун чиқа олдим», — деди у.
Кимнинг айтишича, унинг тирик қолиш имконияти кам эканлигини ўзи билган — у қандли диабет, гипертониядан азоб чекади, COVID-19 ташхиси қўйилганида эса ортиқча вазни ҳам бор эди.
«Тўғрисини айтсам, бу вирусни ростакамига юқтириб олмагунимча, унга янгиликларда айтилаётган оддий нарсадек қарадим. Хўп, ниқоб тақишим керак, хўп, қўлимни яхшилаб ювишим керак. Аммо ҳақиқатда бу вирусни юқтирганимдан кейингина у менга ҳақиқат бўлиб туюлди. Бу жуда хавфли ва ҳаёт учун хатарли вирус», — деди Дениел Ким.
Ким касалликка қарши курашиш йўлида ёлғиз бўлмади, унга докторлар, ҳамширалар, терапевтлар ҳамда бошқа бир тиббиёт марказида ҳамшира бўлиб ишлайдиган синглиси Жули ҳамроҳлик қилди.
«Мен жуда қўрқдим ва жуда хавотирландим. Ҳақиқатда қўрқинчли лаҳзаларни бошдан кечирдим», — деди Жули.
Сент-Жуд тиббиёт марказининг интенсив даволаш бўйича мутахассиси Майкл Кац Кимнинг оғир синовларни бошидан кечирганига гувоҳ бўлди, энди эса унинг соғайгани умид учқунларини уйғотганини айтмоқда.
«Фикримча, бу шундай вазиятки, битта одамнинг бошидан кечирганлари бу босқичдаги юз минглаб кишиларнинг оғир аҳволини кўрсатиб бера олади. Бу ҳақиқатда бир моҳиятга эга. Дениелнинг соғайгани — умид белгисидир», — деди у.
Ким қайтадан юришни ўрганмоқда, у ўзига ҳамма нарсада яна бир имконият берилганидан жуда хурсанд.
«Мен ўзим борадиган жойларга, ейдиган нарсаларимга, гапирадиган гапларимга диққатлироқ бўлмоқчиман. Яъни ҳаётга бошқачароқ нуқтаи назардан қарайман», — деди Ким.
Изоҳ (0)