AQSh vitse-prezidenti Mayk Pens omma oldida koronavirusga qarshi emlandi. Jarayon 18-dekabr kuni Amerika telekanallari orqali jonli efirda namoyish etildi. Bu haqda “Korrespondent.net” xabar berdi.
Mayk Pens bilan birga uning rafiqasi Karen va AQShning bosh jarrohi Jerom Adams ham vaksina qabul qildi. Ularning uchalasi ham Pfizer va BioNTech kompaniyalari tomonidan ishlab chiqarilgan vaksinani olgan.
Ular jurnalistlar bo‘lgan xonadagi stullarga o‘tirgan. Dastlab shifokor ulardan shu vaqtgacha ularda vaksinalardan allergik reaksiya bo‘lmaganini tasdiqlashni so‘ragan, shuningdek, ularga vaksina haqidagi barcha ma’lumotlar tushuntirilgan.
Qisqa so‘rovdan keyin chap yelkaga ukol qilingan, shundan so‘ng shifokor bu emlashning birinchi qismi ekanligi, biroz vaqt qo‘l og‘rishi mumkinligi va 21 kundan keyin ikkinchi ukol uchun kelish kerakligi haqida ogohlantirgan. Barcha jarayon bir necha daqiqani olgan.
“Men hech narsani sezmadim. Yaxshi qilindi. Sizning mamlakat uchun xizmatingizni qadrlayman”, — deya Pens shifokorlarga minnatdorlik bildirdi.
Pensning so‘zlariga ko‘ra, u rafiqasi bilan “koronavirusga qarshi xavfsiz va samarali vaksina” bilan emlanish uchun namuna ko‘rsatganidan xursand.
“Bu hafta koronavirus pandemiyasi yakunining boshi bo‘lishi bilan tarixda qolishiga ishonaman”, — deya qo‘shimcha qilgan Pens.
Eslatib o‘tamiz, AQShda koronavirusga qarshi emlash 14-dekabr kuni boshlandi.
Izoh (0)