Россияда етти ёшгача бўлган ҳамма болаларнинг ота-оналари Янги йилга давлат томонидан бериладиган бир марталик тўловни олиши мумкин бўлади. Бу ҳақда Россия президенти Владимир Путин матбуот анжуманида айтиб ўтди, деб ёзади Meduza.
Президент тегишли фармонни имзолаган. Унда айтилишича, бундай тўловни баҳорда олганларга пул автоматик тарзда ҳисоблаб чиқарилади, қўшимча аризалар ёзиш керак бўлмайди. Қолганлар эса тўловни олиш учун 1 апрелгача мурожаат қилиши мумкин бўлади.
Путин тўловлар ҳақида эълон қилган матбуот анжуманида у етти ёшгача бўлган болалар ҳақида гапирди. Президент фармонида эса гап «РФ фуқаролигига эга бўлган саккиз ёшгача болалар» ҳақида бораётганлиги айтилади. «Давлат хизматлари: ота-оналар учун» Telegram каналида аниқлик киритилишича, 2012 йил 18 декабрдан 2021 йил 3 март оралиғида туғилган болалари бор оилаларга уларнинг ҳар бири учун бир марталик тўлов берилади. Агар бола 2020 йил 18 декабрдан 2021 йил 31 март оралиғида саккиз ёшга тўлса, у учун ҳам шундай тўлов назарда тутилади.
«Давлат хизматлари» сайтида бир марталик тўлов учун ариза бериш мумкин бўлган саҳифа пайдо бўлди.
Баҳорда Путин 14 ёшгача бўлган барча болаларнинг ота-оналарига ҳар бир бола учун 10 минг рубль миқдоридаги бир марталик тўлов ажратишни буюрган эди. Бу кўп одамларнинг ўз ишидан ажралишига сабаб бўлган локдаун шароитидаги ёрдам деб аталган эди.
Изоҳ (0)