Ўзбекистондаги ҳокимлик ва солиқ идоралари тадбиркорларни текшириш билан қўрқитган ёки коррупцияга мажбурлаган — ССПнинг сўровнома натижаси
Савдо-саноат палатаси томонидан тадбиркорлар ўртасида «Тадбиркорлар коррупцияга кўпроқ қайси жараёнларда дуч келган?», «Тадбиркорликнинг эркин ривожланиши, бизнесда барча учун тенг имконият ва шароит яратишга тўсқинлик қилувчи ҳолатлар қайси соҳаларда учрамоқда?» сингари саволларга жавоб топиш мақсадида ўтказилган сўровнома натижасини маълум қилди. Бу ҳақда Коррупцияга қарши курашиш агентлиги хабар берди.
Сўровнома 2020 йил давомида Қорақалпоғистон Республикаси, вилоятлар ва Тошкент шаҳридаги тадбиркорлар ўртасида палатанинг расмий Telegram канали орқали ташкил этилди. Ўтказилган сўров давомида Ўзбекистоннинг барча вилоятларидан 1267 нафар тадбиркор иштирок этган. Иштирокчиларнинг асосий қисми Самарқанд (20 фоиз), Фарғона (17 фоиз), Андижон (14 фоиз), Тошкент (11 фоиз) вилоятлари ҳиссасига тўғри келган.
Уларнинг деярли учдан бир қисми (31 фоиз) 10 йилдан ортиқ, 40 фоизи бир йилдан уч йилгача бўлган муддатда тадбиркорлик билан шуғулланиб келмоқда.
Сўров давомида тадбиркорлардан коррупцион ҳолатга тўқнаш келгани ёки келмагани сўралди. Респондентларнинг 69 фоизи коррупцион ҳолатга кўп маротаба, 9 фоизи бир маротаба тўқнаш келганлигини таъкидлаган бўлса, 22 фоиз тадбиркорлар умуман дуч келмаганлигини билдирган.
Унда тадбиркорларга «Қайси давлат органи мансабдор шахслари фаолиятингизни текшириш, ўрганиш билан қўрқитиш ёки масалангизни ҳал этишда коррупцион муносабатга киришишга мажбур қилган?» саволи бўйича ҳам мурожаат қилинган.
17 фоиз тадбиркорлар бу саволга ҳокимлик, 17 фоизи солиқ идоралари, 13 фоизи кадастр хизмати идоралари, 7 фоизи санитария-эпидемиология хизмати, 7 фоизи банклар, 6 фоизи прокуратура органлари дея жавоб қайтарган.
Мавзуга доир:
