Ўзбекистон Соғлиқни сақлаш вазирлиги 27 ноябрдаги тўғридан-тўғри давлат харидлари доирасида Dori-Darmon компаниясидан 15,3 миллиард сўмлик дори воситаларини харид қилган. Бу ҳақда давлат харидлари портали маълумотларига таяниб, «Gazeta.uz» хабар берди.
Шартнома ўз ичига қуйидагиларни олган:
- қиймати 4,8 миллиард сўм бўлган 100 минг қути азитромицин (бир қутиси — 48,5 минг сўм);
- қиймати 3,9 миллиард сўм бўлган Ҳиндистонда ишлаб чиқарилган «Оксивин» препарати/гидроксихлорохин (ичида 10 таблетка бўлган битта қутининг нархи 7880 сўмни ташкил қилган);
- қиймати 646,5 миллион сўм бўлган 500 минг қути парацетамол;
- қиймати 2,5 миллиард сўм бўлган 166,6 минг қути аскорбин кислотаси (C витамини) (15,5 минг сўм);
- қиймати 2,8 миллиард сўм бўлган 40 минг қути OmiZinc (71,9 минг сўм);
- қиймати 45,8 миллион сўм бўлган 10430 та уч қаватли картон қутилар;
- қиймати 12,2 миллион сўм бўлган 500 минг дона А6 форматидаги қўлланма;
- қиймати 347 миллион сўм бўлган 500 минг қути «COVID-19».
Аввалроқ махсус комиссия баённомаси асосида Соғлиқни сақлаш вазирлиги Dori-Darmon’дан 7,3 миллиард сўмга 1 миллион қути гидроксихлорохин харид қилганди. Мазкур дорилар коронавируснинг олдини олиш учун мактаб ўқитувчиларига тарқатилган.
COVID-19’ни даволашда гидроксихлорохиндан кенг фойдаланишдан Европа Иттифоқининг деярли барча мамлакатлари, Буюк Британия ва АҚШ воз кечган. ЖССТ ҳам мазкур препаратдан фойдаланиш бўйича тавсияларини қайтариб олган.
Безгакни даволайдиган гидроксихлорохин ёрдамида коронавирус инфекциясининг олдини олиш бўйича дастлабки тўлақонли клиник синовлар бу препарат соғлом одамни касалланишдан ҳимоя қилмаслигини кўрсатган. Синовлар натижалари JAMА Internal Medicine илмий журналида чоп этилган.
Изоҳ (0)