Халқаро туризм 2020 йилнинг дастлабки 10 ойида 70 фоиздан кўпроққа пасайиб, 1990 йил даражасига тушди. Бу ҳақда БМТнинг Жаҳон туризм ташкилоти (UNWTO) маълумотларидан келиб чиқиб «Интерфакс» хабар берди.
«2020 йилда халқаро туризмнинг 72 фоизга пасайиши саёҳат чекловлари, истеъмолчилар қўрқуви ва коронавирус тарқалишининг олдини олиш бўйича глобал кураш билан боғлиқ. Буларнинг барчаси бу йилнинг туризм тарихидаги энг ёмон йил бўлишига олиб келди. Сўнгги маълумотларга кўра, январь—октябрь ойида дунё мамлакатлари 2019 йилнинг шу даврига нисбатан 900 миллион камроқ сайёҳ қабул қилди», — дейилади ташкилот баёнотида.
Ундаги маълумотларга кўра, бу халқаро туризмда 935 миллиард долларлик экспорт даромадлари йўқолишига олиб келди, бу эса 2009 йилда жаҳон иқтисодий инқироз туфайли ушбу соҳага етказилган зарарнинг 10 бараварига тенгдир.
«Амалдаги статистик маълумотларга асосан, йил охирига қадар халқаро сайёҳлик ташрифи сони бир миллиардга ёки 70-75 фоизга камайиб, 30 йил аввалги даражага қайтишини тахмин қилиш мумкин. Соҳадан тушадиган даромад йўқотиши эса 1,1 триллион долларга етади. Бундай кескин пасайиш жаҳон ЯИМнинг 2 триллион долларга қисқаришига олиб келади», — дейилади UNWTO хабарида.
Осиё-Тинч океани минтақасида саёҳатлар сони, айниқса, сезиларли пасайган — 10 ой ичида у 82 фоизга камайди. Яқин Шарқда пасайиш 73 фоизни, Африкада 69 фоизни ташкил этди. Европа ва Америкага халқаро сайёҳлик 68 фоизга камайди. Ёз ойида туризмнинг қисқа муддатли тикланиши туфайли Европадаги пасайиш камроқ бўлди. Пандемиянинг иккинчи тўлқини бошланганидан кейин минтақада яна чекловлар жорий этилди. Бироқ UNWTO маълумотларига кўра, минтақадаги мамлакатларнинг 91 фоизи саёҳат қилиш чекловларини умуман олганда юмшатган.
«Сайёҳлар харажатлари тўғрисидаги маълумотлар халқаро саёҳатлар учун талаб ҳали ҳам жуда паст эканлигидан далолат бермоқда. Бироқ АҚШ, Германия ва Франция каби давлатларнинг бозорларида сўнгги пайтларда тикланишнинг айрим белгилари кўринмоқда. Бундан ташқари, Россия, Хитой ва бошқа айрим мамлакатларнинг ички туризмига талаб ўсишда давом этмоқда», — дейилади хабарда.
UNWTO прогнозларига кўра, 2021 йилнинг иккинчи ярмига келиб туризм қисман тикланиши мумкин. Аммо 2019 йилги халқаро даражасига қайтиши катта эҳтимол билан 2,5 йилдан 4 йилгача вақт олиши мумкин.
«Вакцинация бошлангани тўғрисидаги янгиликлар истеъмолчиларнинг саёҳатга бўлган хоҳишини оширади, аммо саноатнинг тикланишига ҳали анча бор. Мамлакатлар чегарасини хавфсиз очиш, туризм соҳасидаги ташкилот ва иш жойларни қўллаб-қувватлаш бўйича ишларни кучайтиришлари керак. Туризм иқтисодиёт секторлари орасида энг кўп зарар кўрганлиги янада яққол намоён бўлмоқда», — деган ташкилот раҳбари Зураб Пололикашвили.
Изоҳ (0)