Американинг 10 та штати Google ва Facebook’ни тил бириктирганликда айблади

Техас бош прокурори Кен Пакстон Американинг ўнта штати номидан судга Google’га қарши жамоавий даъво бериб, уни монополияга қарши қонунчиликни бузганликда айблади, деб ёзади «РБК».

«Техас монополияга қарши федерал қонунчиликни ва истеъмолчилар ҳуқуқларини ҳимоя қилиш тўғрисидаги қонунларни кўп марта бузганлиги юзасидан Google’га қарши суд даъвосида бир нечта штатлардан иборат коалицияга раҳбарлик қилди», — дейилади бош прокурор офиси тарқатган хабарда.

Шикоятлар, даъвогарлар фикрича, ноқонуний йўллар билан интернет-рекламани монополлаштирган IТ-гигант фаолиятига алоқадор. Хусусан, компанияни Facebook билан рақобатга қарши битим тузишда, фойдаланувчиларни чалғитишда ва ҳалол рақобатга тўсқинлик қилишда айблашмоқда.

«Google — ўз қудратини сурбетларча суиистеъмол қилаётган триллион долларлик монополия. Компания Facebook раҳбариятини рақобатчилик моҳиятига путур етказадиган шартнома схемасига рози бўлишга оғдирмоқда. Google, аслида, инсайдерлик маълумотлари билан савдо қилади. Бу ерда эркин бозор ишламайди. Агар бу бейсбол ўйини бўлганида эди, Google ҳам питчер, ҳам қайтарувчи, ҳам ҳакам бўлиб қатнашган бўларди. Бу штат қонунларига ва федерал қонунга ҳам зиддир», — деди Пакстон.

Даъво матнида таъкидланишича, Google ва Facebook интернетдаги реклама бозорини бўлиб олиш ва бир-бири билан рақобатлашишдан қочиш учун тил бириктириб олган. Даъвогарларнинг иддаоларига кўра, ушбу келишув бўйича Facebook интернет-реклама бозорининг баъзи секторларини қўлга киритган, Google эса бутун бозорда етакчи позициясини сақлаб қолган. Иккала компания ҳам рекламага буюртмалар тақсимланган кимошди савдоларида ўз ҳаракатларини мувофиқлаштирган.

Ушбу тил бириктирув шарофати билан Google ўз мижозлари учун реклама нархини ошириши мумкин бўлган. Охир-оқибат бу молиявий юклама, даъвогарлар қайд этишича, маҳсулот ва хизматлар нархини ошириш ва сифатини пасайтириш ҳисобидан америкалик истеъмолчилар елкасига тушган.

Даъвога Техасдан ташқари, Айдаҳо, Арканзас, Индиана, Кентукки, Миссисипи, Миссури, Шимолий ва Жанубий Дакота ва Юта штатлари қўшилган. Bloomberg хабарига кўра, даъвогарлар суд ишига 42-АҚШ президенти Билл Клинтонга нисбатан импичмент бўйича танилган ҳуқуқшунос Кен Старрни жалб қилмоқчи.

Google вакили Жули Макалистернинг маълум қилишича, Пакстоннинг иддаолари асоссиз. «Биз судда унинг асосланмаган айбловларидан қатъий ҳимояланамиз», — деди у.

Октябрь ойида ҳам бир қатор штатлар Google’ни монополияга қарши қонунчиликни бузганликда айблаб судга берган эди. Ўшанда компания браузерлар бозорини монополлаштирганлиги иддао қилинган эди.

Эслатиб ўтамиз, Техас бош прокурори Кен Пакстон 8 декабрь куни тўртта штатда президент сайлови натижаларини қайта кўриб чиқишни сўраб Олий судга ариза берганди. Ҳокимият тепасида республикачилар бўлган 17 та штат вакиллари ушбу даъвони қўллаб-қувватлади.