2020 йилда дунёда саратон касаллиги сони 19,3 миллионга этади, 10 миллион киши ушбу касалликдан вафот этади. «Gazeta.uz»нинг БМТ матбуот хизматига таяниб маълум қилишича, бу ҳақда Саратонни ўрганиш халқаро агентлиги (IARC)нинг янги ҳисоботида айтилган.
Ҳужжатда айтилишича, дунё аҳолисининг ҳар 5 дан бири саратон касаллигига чалинади, эркакларнинг ҳар 8 нафардан бири, аёлларнинг эса ҳар 11 нафардан бири ушбу касалликдан вафот этади. Саратон ташхиси қўйилганидан 5 йил ўтиб омон қолганлар сони ҳам ошмоқда — айни пайтда улар сони 50,6 миллион нафарга етган.
Энг кенг тарқалган 10 та саратон касаллиги турига 60 фоиз янги касалланиш ҳолатлари ва 70 фоиз ўлимлар тўғри келади.
Энг кенг тарқалган саратон тури рўйхатида аёлларда кўкрак бези саратони 1-ўринда, ўпка саратони 2-ўринда, ингичка ичак саратони 3-ўринда туради. Ундан кейинги ўринларни простата бези саратони ва ошқозон саратони эгаллайди.
Ўпка саратони эркаклар учун энг хавфли деб тан олинган — бу касаллик эркаклар орасида барча ўлимларнинг 18 фоизини ташкил қилади. Эркаклар ҳаёти учун хавфли бўлган иккинчи онкологик касаллик бу — простата саратонидир. Аёллар кўпинча кўкрак бези саратони, ўпка саратони ва ректал саратон касаллигидан вафот этади.
Олимларнинг ҳисоб-китобига кўра, 2040 йилга бориб онкологик касалликка чалиниш йиллик янги ҳолатлари сони 47 фоизга ошади ва 28,4 миллион кишига етади. Ушбу статистик маълумотлардаги аксарият ҳолатлар инсон тараққиёти кўрсаткичи паст ва ўрта бўлган мамлакатларга тўғри келади.
Маълумот учун, Ўзбекистон Инсон камолоти бўйича 2020 йилги индексда 189 мамлакати ичида 106-ўринда. Декабрь ойи бошларида Ўзбекистонда онкологик хизматни ривожлантиришга қаратилган хайрия жамоат фонди ташкил этилди. 2019 йилда республикада онкологик хасталиклар билан 24 648 та янги касалланиш ҳолати аниқланган (улар орасида эркаклар 10 511 нафарни ва аёллар 14 137 нафарни ташкил этди).
Айни пайтда умумий касалланиш структурасида юқори ўринни кўкрак бези, меъда ва бачадон бўйни саратони сақлаб қолмоқда. 2019 йилда эркаклар орасида умумий касалланиш структурасида етакчи ўринларни меъда, бронхлар ва ўпка, шунингдек, бош миядаги зарарли ўсмалар билан касалланиш эгалламоқда.
Изоҳ (0)