Дунёнинг энг бой одамлари 2020 йилда ўз бойлигини қарийб 2 трлн долларга кўпайтирди

Дунёда 2200 нафардан ортиқ миллиардер 2020 йилнинг якуни бўйича 1,9 триллион долларга бойиди. Бу ҳақда Forbes ҳисоб-китобига таяниб, «РБК» хабар берди.

Дунёдаги барча миллиардерларнинг умумий бойлиги 11,4 триллион долларга баҳоланмоқда. Forbes ҳисоб-китобига кўра, бу 2019 йилнинг 31 декабридаги ҳолатга нисбатан 20 фоизга кўпроқ.

Миллиардерлар бойлиги ортишининг асосий сабаби фонд бозорида давом этаётган ўсиш ҳисобланади.

600 нафардан ортиқ америкалик миллиардернинг бойлиги 4 триллион долларни ташкил қилмоқда, йил бошидан буён қайд этилган 560 миллиард долларлик ўсишга ҳам фонд бозоридаги ўсиш ҳисса қўшган. Энг юқори тарихий даража атрофида турган S&P 500 биржаси индекси 2020 йилда 13 фоизга кўтарилган. Март ойида коронавирус сабабли кузатилган пасайишга қарамасдан, Nasdaq индекси 38 фоизга ўсган.

Капитал ўсишининг рекорд даражасига Илон Маск эришган. Унинг бойлиги 100 миллиард доллардан 137 миллиард долларга ошган ва уни дунёнинг энг бой одамлари рўйхатидан учинчи қатордан жой олишига хизмат қилган. Макснинг бойлиги ортишига Tesla Motors компанияси акцияларининг 630 фоизга қимматлагани сабаб бўлган.

Forbes АҚШ президентлик сайловининг эртаси куни, 5 ноябрда мамлакатнинг энг бой 10 та одами бойлиги 33 миллиард долларга кўпайганини маълум қилган. Энг сезиларли ўсишни Amazon компанияси раҳбари Жефф Безоснинг активлари кўрсатган, унинг бойлиги 10,5 миллиард долларга кўпайиб, 190,6 миллиард долларга етган.

Жефф Безоснинг ортидан Facebook асосчиси Марк Цукерберг кетмоқда, унинг бойлиги 8 миллиард долларга кўпайган ва 105,5 миллиард долларга етган. Сайловдан бир неча кун олдин, АҚШ фонд биржаларидаги пасайиш сабабли Марк Цукерберг бироз муддатга бойлиги 100 миллиард доллардан кўп бўлган одамлар рўйхатидан чиқиб кетгам.

Google асосчиларидан бири Ларри Пейж ва Ҳиндистоннинг Reliance Industries холдинги асосчиси Мукеш Амбанининг бойлиги бир хил — 4 миллиард долларга кўпайган ва мос равишда 77 миллиард доллар ва 74,1 миллиард долларга етган. Google’нинг яна бир асосчиси Сергей Бриннинг бойлигига 3,8 миллиард доллар қўшилган. Louis Vuitton ва Dior эгаси Бернар Арно 3,6 миллиард доллар ишлаб топган. Microsoft асосочиси Билл Гейтснинг бойлигига 668 миллион доллар қўшилган.