Dunyoning eng boy odamlari 2020-yilda o‘z boyligini qariyb 2 trln dollarga ko‘paytirdi

Dunyoda 2200 nafardan ortiq milliarder 2020-yilning yakuni bo‘yicha 1,9 trillion dollarga boyidi. Bu haqda Forbes hisob-kitobiga tayanib, “RBK” xabar berdi.

Dunyodagi barcha milliarderlarning umumiy boyligi 11,4 trillion dollarga baholanmoqda. Forbes hisob-kitobiga ko‘ra, bu 2019-yilning 31-dekabridagi holatga nisbatan 20 foizga ko‘proq.

Milliarderlar boyligi ortishining asosiy sababi fond bozorida davom etayotgan o‘sish hisoblanadi.

600 nafardan ortiq amerikalik milliarderning boyligi 4 trillion dollarni tashkil qilmoqda, yil boshidan buyon qayd etilgan 560 milliard dollarlik o‘sishga ham fond bozoridagi o‘sish hissa qo‘shgan. Eng yuqori tarixiy daraja atrofida turgan S&P 500 birjasi indeksi 2020-yilda 13 foizga ko‘tarilgan. Mart oyida koronavirus sababli kuzatilgan pasayishga qaramasdan, Nasdaq indeksi 38 foizga o‘sgan.

Kapital o‘sishining rekord darajasiga Ilon Mask erishgan. Uning boyligi 100 milliard dollardan 137 milliard dollarga oshgan va uni dunyoning eng boy odamlari ro‘yxatidan uchinchi qatordan joy olishiga xizmat qilgan. Maksning boyligi ortishiga Tesla Motors kompaniyasi aksiyalarining 630 foizga qimmatlagani sabab bo‘lgan.

Forbes AQSh prezidentlik saylovining ertasi kuni, 5-noyabrda mamlakatning eng boy 10 ta odami boyligi 33 milliard dollarga ko‘payganini ma’lum qilgan. Eng sezilarli o‘sishni Amazon kompaniyasi rahbari Jeff Bezosning aktivlari ko‘rsatgan, uning boyligi 10,5 milliard dollarga ko‘payib, 190,6 milliard dollarga yetgan.

Jeff Bezosning ortidan Facebook asoschisi Mark Sukerberg ketmoqda, uning boyligi 8 milliard dollarga ko‘paygan va 105,5 milliard dollarga yetgan. Saylovdan bir necha kun oldin, AQSh fond birjalaridagi pasayish sababli Mark Sukerberg biroz muddatga boyligi 100 milliard dollardan ko‘p bo‘lgan odamlar ro‘yxatidan chiqib ketgam.

Google asoschilaridan biri Larri Peyj va Hindistonning Reliance Industries xoldingi asoschisi Mukesh Ambanining boyligi bir xil — 4 milliard dollarga ko‘paygan va mos ravishda 77 milliard dollar va 74,1 milliard dollarga yetgan. Google’ning yana bir asoschisi Sergey Brinning boyligiga 3,8 milliard dollar qo‘shilgan. Louis Vuitton va Dior egasi Bernar Arno 3,6 milliard dollar ishlab topgan. Microsoft asosochisi Bill Geytsning boyligiga 668 million dollar qo‘shilgan.