Россияда мигрантлар учун қўшимча тўловлар жорий қилиниши мумкин. Бу ҳақда Россия давлат кенгаши аъзоси Вячеслав Володин хабар берди.
Унинг таъкидлашича, тегишли қонун лойиҳаси келгуси ҳафтада имзоланади.
“Россияга визасиз мамлакатлардан келганлар ойига ўртача 8-10 минг рубль турадиган патент олади. У узоғи билан бир йил амал қилади. Сўнгра патент олиш жараёнини қайтадан ўтказиш керак бўлади. Виза талаб қиладиган мамлакатлардан келган муҳожирлар эса ишлаш учун рухсатнома расмийлаштиришига тўғри келади. Ушбу ҳафтада мигрантлар учун қўшимча давлат божлари жорий этадиган қонун лойиҳаларини кўриб чиқишни бошлаймиз”, деган Володин.
Володин тақдим этган янги қонун лойиҳасига кўра, мигрантлар қуйидаги тўловларни қоплаши керак бўлади:
- чет эл фуқаросига ёки фуқаролиги бўлмаган шахсга патент берганлик ёки қайта расмийлаштирганлик учун — 4 200 рубль;
- ишлаш рухсатноманинг амал қилиш муддатини узайтириш учун — 4 200 рубль;
- патент ёки ишлаш учун рухсатнома дубликатини берганлик, уларга ўзгартиришлар киритганлик учун — 2 100 рубль.
Бундан ташқари, мигрантлар учун бир қатор бошқа божларини белгилаш ёки ошириш таклиф қилинмоқда. Жумладан:
- чет эл фуқароси ёки фуқаролиги бўлмаган шахсни турган жойи бўйича ҳисобга қўйиш учун;
- чет эл фуқароси ёки фуқаролиги бўлмаган шахсни мамлакатда яшаш жойи бўйича рўйхатдан ўтказганлик учун;
- Россияда вақтинча бўлиш муддатини узайтириш учун;
- автомобиллар ва бошқа транспорт воситалари билан боғлиқ рўйхатдан ўтказиш ҳаракатларини амалга оширганлик учун тўловлар жорий этилади.
Буларнинг барчаси нафақат бюджетга маблағ тушумини ошириш, балки мигрантлар устидан назоратни кучайтириш, уларнинг ҳақиқий яшаш жойларини аниқлаш имконини беради. Расмийларга кўра, бу ноқонуний миграция даражасини пасайтиришга ҳам хизмат қилади.
Изоҳ (0)