Таҳлилларга кўра, Ўзбекистонда бугунги кунда газ таъминотида суткасига 20 миллион метр куб танқислик мавжуд. Бу ҳақда айни пайтда Шавкат Мирзиёев раислигида ўтказилаётган видеоселектор йиғилишида сўз борди, дея хабар бермоқда «Дарё» мухбири.
«Газ тизими билан боғлиқ муаммолар бугун юзага келмагани, балки ўттиз йилдан бери бизни қийнаб келаётганидан барчамиз хабардормиз. Лекин, буни баҳона қилишга ҳеч кимнинг ҳаққи йўқ. Халқимизга газ керак, уларнинг кўпчилиги ушбу газдан фойдаланиш учун тўловларни ўз вақтида ҳалол қилиб, тўлаб келмоқда.
Ҳозирда 1 мингдан зиёд маҳалла, жумладан Андижонда – 429 та маҳалла, Наманганда –180 та, Фарғонада – 142 та, Тошкент вилоятида – 73 та маҳаллада табиий газ босимлари пасайган. Газ экспортини қисқартириш бўйича топшириқ бердим. Бунинг ҳисобига, кунига 7–8 миллион метр куб газ қўшимча равишда аҳоли эҳтиёжи учун йўналтирилади», – деди Шавкат Мирзиёев.
Йиғилишда давлат раҳбари табиий газ ишлаб чиқаришни кўпайтириш учун самарасиз ишлаётган 25 та конни инвесторларга «риск-сервис контракт» шартлари асосида бериш чораларини кўриш бўйича масъулларга топшириқ берган.
Изоҳ (0)