Шавкат Мирзиёев электр энергияси, табиий газ ва кўмир таъминотида йўл қўйилаётган ноқонуний хатти-ҳаракатлар ҳақида гапирди

Ўзбекистонда 2020 йилнинг декабрь ойида ҳуқуқ-тартибот органлари томонидан ўтказилган ўрганишлар натижасида республика бўйича 1 минг 525 та ҳолатда 59 миллиард сўм қийматдаги энергоресурслар талон-тарож қилингани аниқланган. Бу ҳақда айни пайтда Шавкат Мирзиёев раислигида ўтказилаётган видеоселектор йиғилишида сўз борди, дея хабар бермоқда «Дарё» мухбири.

Давлат раҳбари электр энергияси, табиий газ ва кўмир таъминотида ноқонуний хатти-ҳаракатларга ҳам йўл қўйилаётгани ҳақида сўз юритди.

«Тошкент вилояти Янгийўл тумани электр таъминоти корхонаси бош муҳандиси ўз ходимлари билан 500 доллардан 2 минг долларгача пора олиб, ҳеч қандай расмий ҳужжатларсиз истеъмолчиларни электр тармоғига улаб келган. Самарқанд вилояти ҳокимлиги вакилларининг бепарволиги оқибатида аҳолига мўлжаллаган 80 тонна суюлтирилган газ ўғирланишига йўл қўйилган.

Ёки бўлмаса, Муборакда ғишт ишлаб чиқариш заводи ер остидан ўтган газ қувурига ноқонуний уланиши оқибатида, 4,3 миллион куб метр газни талон-торож қилган. Бу – қарийб 8 минг хонадоннинг бир ойлик газ таъминотидир. Тошкент шаҳридаги ‘Тошиссиққуввати’ корхонасига қарашли ‘Саноат энергия’ қозонхонаси ҳудудида ташкил этилган оҳак ишлаб чиқариш цехи газ тармоғига ноқонуний уланиб, 571 минг куб метр газ сарфлаган. Агар тўлиқ ҳисоблагичларни ўрнатганимизда, бу каби ноқонуний ишлар кузатилмасди», – деди президент.

Йиғилишда таъкидланишича, 2020 йилда 74 та тумандаги аҳоли пунктларида йирик газ тармоқларига замонавий ўлчагичлар ўрнатиш оқибатида 2 мингдан зиёд улгуржи истеъмолчилар томонидан 7 миллион куб метр табиий газ ноқонуний ўзлаштирилгани ойдинлашган. Бош прокуратура ва солиқ идоралари кўмир олди-сотдиси билан боғлиқ 110 та ноқонуний ҳолатни аниқланган. Наманганда – 54 та (362 тонна), Андижонда – 33 та (145 тонна), Фарғонада − 9 та (88 тонна), Навоийда – 7 та (21 тонна), Қорақалпоғистонда – 3 та (12 тонна) ҳолат аниқланган.