Андижонда 20 ёшли аёл 4 ойлик ўғлини 5200 долларга сотаётган вақтида ушланди. Бу ҳақда ИИВ Тергов департаменти хабар берди.
Хабарга кўра, 12 декабрь куни Андижон вилояти ИИБ ҳамда ДХХ вилоят бошқармаси ходимлари билан ҳамкорликда олиб борилган тезкор тадбир давомида Жалақудуқ тумани «Туялас» МФЙда яшовчи 20 ёшли аёл Д.К. ўзининг 2020 йил 15 август куни туғилган ўғлини «Бозорбоши» МФЙ кўчасида жойлашган «Гап» кафесида харидор сифатида жалб қилинган фуқарога кимёвий ишлов берилган 5200 доллар эвазига сотаётган вақтида ашёвий далиллар билан ушланган.
Тезкор тадбир давомида аёлдан кимёвий ишлов берилган 5200 доллар ашёвий далил сифатида холислар иштирокида расмийлаштириб олинган.
Ҳолат юзасидан Жалақудуқ тумани ИИБ ҳузуридаги тергов бўлинмаси томонидан Д.К.га нисбатан Жиноят кодексининг 135-моддаси (одам савдоси) 3-қисми «а» банди билан жиноят иши қўзғатилган ва у гумон қилинувчи тариқасида иштирок этишга жалб қилиниб, сўроқ қилинган.
Ҳозирда жиноят иши бўйича дастлабки тергов олиб борилмоқда.
Аввалроқ Сирдарёда 1,5 ёшли боласини 17 минг долларга сотган онага ҳукм ўқилгани, шу вилоятда тўрт кунлик чақалоғини 20 минг долларга сотаётган аёл, Хивада 4 ойлик қизини 120 миллион сўмга сотмоқчи бўлган аёл ҳамда Наманганда 6 ойлик чақалоғини 1,9 миллион сўмга сотиб юборган турмушга чиқмаган аёл қўлга олингани ҳақида хабар берилганди.
Изоҳ (0)