Тошкент шаҳар Сергели туманида Gentra автомашинасини олиб қочиб, унинг эҳтиёт қисмларини бозорда сотиб юборган шахс қўлга олинди, дея хабар бермоқда Тергов департаменти.
Маълум қилинишича, 2020 йилнинг 4 декабрь куни соат, тахминан, 13:00 ларда 24 ёшли Мақсудхон М. Сергели туманида 28 ёшли Ҳакимжон Ю.нинг Gentra машинаси йўлнинг четида қаровсиз қолдирилганлигидан фойдаланиб, ўзганинг транспорт воситасини талон-торож қилиш мақсадида автомашинанинг олди ўнг ойнасини ўзининг ёнида бўлган темирдан ишланган болға билан синдирган.
У Сергели тумани «Олчазор» МФЙ Шокирариқ кўчасида жойлашган қурилиши тугалланмаган уйнинг ёнигача машинани бошқариб бориб, салонда бўлган пулларни, автомобиль ичида бўлган уяли алоқа воситаси, банк пластик карточкасини, ҳайдовчига тегишли бўлган шахсига оид ҳужжатларни ўғрилик йўли билан ўзлаштирган.
Бундан ташқари, автомашинанинг олд ёриткич чироқларини, автомагнитоласини, автомашина эшикларининг ички қопламасини, автомашина таблоси ва қўриқлаш тизими пультини автомашинадан ечиб олиб, Ҳакимжон Ю.га жами 11 950 000 сўм миқдорида моддий зарар етказиб, ҳодиса жойидан яширинган.
Мазкур ҳолат юзасидан 2020 йил 4 декабрь куни Сергели туман 2-сон ИИБ Тергов бўлинмаси томонидан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган.
Дастлабки тергов жараёнида аниқланишича, Мақсудхон М. ноқонуний йўл билан эгалланган автомобиль жиҳозларини «Фарҳод» автомобиль эҳтиёт қисмлари бозорида учинчи шахсларга сотиб юборган.
Ҳозирда Мақсудхон М.га нисбатан Жиноят кодексининг 267-моддаси 2-қисми «г» банди (транспорт воситасини талон-торож қилиш мақсадида ўғрилик ёки талончилик йўли билан олиб қочиш) ва 227-моддаси 2-қисми «а» (автомототранспорт воситаларининг давлат рақам белгиларини эгаллаш, нобуд қилиш, уларга шикаст етказиш ёки уларни яшириш) банди билан айб эълон қилиниб қамоққа олиш тарзидаги эҳтиёт чораси танланган.
Ҳозирда жиноят иши юзасидан тергов ҳаракатлари олиб борилмоқда.
Аввалроқ Оқдарёда танишининг Lacetti’сини олиб қочган маст ҳайдовчи бетон тўсиқни бузиб ўтгани, Ўзбекистон чемпиони Фарғонада жарима майдонидан Jawa мотоциклини ўғирлагани учун суд қилингани ҳамда Тошкентда Spark’ни ўғирлаб кетиб, ЙТҲга учраган йигит ҳибсга олингани ҳақида хабар берилганди.
Изоҳ (0)