Қамчиқ довонида 14 соат давомида 13 та машина қатнашган йўл-транспорт ҳодисалари содир бўлди, дея хабар қилмоқда Фавқулодда вазиятлар вазирлиги.
Қайд этилишича, 2020 йилнинг 13 декабрь куни соат 19:00 дан 14 декабрь куни соат 09:00 га қадар А-373 Тошкент—Ўш автомобиль йўлининг 258, 259 ва 265-километр ҳудудларида жами 3 та ҳолатда 13 та турли русумдаги автотранспорт воситаларининг музлама йўлларда бошқарувни йўқотиши йўл-транспорт ҳодисаларига сабаб бўлган.
Воқеа жойига ФВВ «Қамчиқ» махсус қидирув, ёнғин-қутқарув бошқармаси ва бошқа тегишли ташкилот ходимлари зудлик билан етиб бориб, ЙТҲ оқибатларини бартараф этди.
Юзага келган вазиятлар оқибатида тан жароҳати олган ва ҳалок бўлганлар йўқ.
Фавқулодда вазиятлар вазирлиги йўл-транспорт ҳодисалари билан боғлиқ фавқулодда вазиятларнинг олдини олиш мақсадида довон ҳудудида ҳаракатланишда ҳайдовчилардан барча хавфсизлик чораларини кўриш ва ҳушёрликни йўқотмасликни сўраган.
Аввалроқ Наманганда 2020 йилнинг 11 ойи давомида 152 киши ЙТҲ қурбони бўлгани, Қамчиқда 24 тонна пропан олиб кетаётган юк машинаси ағдарилиб кетгани ҳамда Damas ўзидан олдинги юк машинасига урилиши оқибатида бир киши ҳалок бўлгани ҳақида хабар берилганди.
Изоҳ (0)