Сурхондарёда Cobalt автомашинаси таъмирлаш ишлари олиб борилаётган йўлда тезлигини оширгани сабаб йўл-транспорт ҳодисаси содир бўлди, дея хабар қилади ЙҲХББ.
Қайд этилишича, 2020 йил 10 декабрь куни соат 21:30 ларда Шеробод тумани «Олтин воҳа» маҳалласи ҳудудидан ўтувчи халқаро аҳамиятга эга бўлган М-39 автомобиль йўлининг 1415-километрида Cobalt русумли автомашина ҳайдовчиси Термиз—Тошкент йўналишида бошқариб келиб, йўлнинг қурилиш ишлари олиб борилаётган ҳудудида автомашина тезлигини ошириб ҳаракатланган. Бунинг натижасида автомобиль йўл чеккасига чиқиб кетиб, ЙТҲ содир этган.
Оқибатда автомашина ҳайдовчиси олган тан жароҳатлари натижасида ҳодиса жойида вафот этди.
Ҳодиса юз берган вақтда автомашина ичида бўлган йўловчи билан дастлабки суриштирув ҳаракатлари олиб борилмоқда. Ҳозирги кунда ҳолат юзасидан Жиноят кодексининг 266-моддаси 2-қисмига (одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) асосан жиноят иши қўзғатилиб, дастлабки тергов ҳаракатлари олиб борилмоқда.
Мутасаддилар томонидан ҳодиса сабаби ўрганилди. Унга кўра, ҳодисага ҳайдовчининг тезликни оширгани ҳамда йўлнинг таъмирланаётган ҳудуди тунги ёритиш чироқлари билан жиҳозланмагани сабаб бўлган.
Аввалроқ Сурхондарёда тепловоз Matiz’ни уриб юбориши оқибатида автомобиль ҳайдовчиси воқеа жойида вафот этгани, Иштиҳонда Matiz ва Nexia’нинг тўқнашиши оқибатида ҳайдовчилардан бири вафот этгани ҳамда Навоийда Matiz ағдарилиб кетиши натижасида ҳайдовчи ҳалок бўлгани ҳақида хабар берилганди.
Изоҳ (0)