Арманистон президенти Арман Саркисян Россия президенти Владимир Путиндан Арманистон ва Озарбайжон ўртасидаги чегараларни демаркация қилиш жараёнини қўллаб-қувватлашни сўради. Тегишли мактуб Арман Саркисян томонидан Россия президентига юборилди, деб хабар бермоқда «РБК».
«Арманистон президенти, афсуски, демаркация масаласи сабабли томонлар ўртасида янги баҳсларнинг юзага келиш хавфи мавжудлигини таъкидлади», — дейилади Арманистон президенти матбуот хизмати хабарида.
Қайд этилишича, мазкур масаланинг долзарблиги ва ўта муҳимлигини инобатга олган ҳолда, воқеаларнинг салбий ривожи ва тарангликларнинг олдини олиш мақсадида Саркисян Путиндан Арманистон ва Озарбайжон ўртасидаги демаркация жараёнини якунлашда ёрдам кўрсатишни сўраган.
Арманистон президенти Путинга Тоғли Қорабоғдаги жанговар ҳаракатларни ва ўт очишни тўхтатишга хизмат қилган уринишлар учун яна бир марта миннатдорлик билдирган.
Аввалроқ Арманистон бош вазири Никол Пашинян арман-озар чегарасида фронт чизиғи бўлиши керак эмаслигини айтган. «Бизнинг қуролли кучларимиз чегара бўйлаб жойлаштирилади. Бу жараён одамлар онгида муаммони юзага келтиради. Амалий хусусиятдаги бошқа муаммолар ҳам бор, бироқ улар ҳал қилиб бўлмайдиган муаммолар эмас ва биз уларнинг ечими устида ишлаяпмиз. Бизнинг кейинги ҳаракатларимиз ҳақиқий чегарани шакллантиришга қаратилиши лозим, фронт чизиғини эмас ва биз шу йўлдан кетишимиз керак», — деган Пашинян.
Изоҳ (0)