АҚШнинг озиқ-овқат ва дори-дармонлар сифати масалалари бошқармаси Pfizer ва BioNTech компаниялари томонидан яратилган коронавирусга қарши вакцинанинг самарадорлиги 95 фоизни ташкил этишини тасдиқлади. Бу ҳақда «Korrespondent.net» хабар берди.
Таъкидланишича, самарадорликнинг бундай даражасига вакцинанинг иккинчи дозаси юборилганидан етти кун ўтгач эришилади.
«Режалаштирилган оралиқ ва якуний таҳлилларда вакцинанинг самарадорлиги SARS-CoV-2 инфекцияси билан касалланганликда гумон қилинмаганларда иккинчи доза юборилганидан етти кундан кейин 95 фоизни ташкил этди, касалланганлар гуруҳида эса самарадорлик 94 фоиздан ошган», — дейилади бошқарма хабарида.
Биринчи дозадан кейинги самарадорлик 82 фоизга баҳоланмоқда, бироқ препарат юборилганидан уч ҳафта ўтгач, унинг ҳимоя даражаси пасайиш-пасаймаслиги номаълум.
Касалликнинг оғир ҳолатларида эса биринчи дозадан кейинги самарадорлик 88,9 фоиз бўлган. Вакцина ўзида қўзғатувчи ҳақида генетик маълумот сақловчи ген вакциналар гуруҳига киради.
Аввалроқ Pfizer ва BioNTech компаниялари уларнинг вакцинаси самарадорлиги 95 фоиз эканлигини маълум қилганди.
Bloomberg хабарига кўра, АҚШ Pfizer вакцинасидан 600 миллионта дозани олдиндан буюртма қилиб қўйган. Йил охиригача компания 100 миллионта доза ишлаб чиқариши керак эди, аммо унда илк босқичларда хом ашё етказиб бериш билан боғлиқ муаммолар юзага келди, шу сабабли икки марта камроқ доза ишлаб чиқаради.
Изоҳ (0)