Швейцарияда ниқоб тақмаганлар 230 евро жаримага тортиладиган бўлди

Швейцарияда коронавирус тарқалишига қарши қаратилган чеклов чораларига риоя қилмаганлик учун жарима жорий этишга қарор қилинди. Бу ҳақда мамлакатнинг Маten нашрига таяниб, «Интерфакс» хабар берди.

Унга кўра, жамоат жойларда ниқоб тақмаганлик учун 250 Швейцария франки (230 евро) миқдорида жарима солинади.

Агар карантинда бўлган ёки ўзини изоляция қилган шахс белгиланган режимни бузса, жарима миқдори 1500 франк (1390 евро)га етиши мумкин.

Шу каби санкциялар 8 декабрь куни Швейцария прокурорларининг конференциясида мамлакат бўйлаб коронавирус чекловларини бузганлик учун жазо тизимини бирлаштириш учун киритилган.

Октябрь ойининг ўрталаридан бошлаб Швейцария жамоат жойларида, шу жумладан, темир йўл станцияси, аэропорт, савдо марказларида ниқоб тақишни мажбурий этиб белгиланганди. Иш берувчиларга ўз ходимларини масофадан ишлашга ўтказиш тавсия қилинган.

Швейцарияда пандемия даврида 350 минг кишида COVID-19 қайд этилган. Инфекция оқибатидан 5,4 мингдан ортиқ киши вафот этган, 280 минг нафари соғайган.