Фарғона вилоятининг Учкўприк тумани маъмурий судида ҳудуддаги 4-мактабнинг олти нафар ўқитувчиси манфаатини кўзлаб адлия бўлими томонидан киритилган даъво аризаси кўриб чиқилди. Маъмурий суд раиси Камолиддин Раҳимов раислигида ўтган суд мажлисида ўқитувчиларни тиббий кўрикдан бепул ўтказиш талаби қаноатлантирилган. Бу ҳақда «Дарё» мухбири хабар берди.
Учкўприк тумани адлия бўлими бошлиғи Шукуржон Холматовнинг маълум қилишича, тумандаги 4-умумий ўрта таълим мактаби ўқитувчилари — М.Қодирова, Н.Қодирова, О.Бозорова, Д.Тожиева, Д.Масолиева, З.Эрматованинг бепул тиббий кўрикдан ўтиш ҳуқуқидан фойдаланиш масаласида амалий ёрдам сўраб қилган мурожаати ўрганиб чиқилган.
Аниқланишича, умумий ўрта таълим ва мактабгача таълим муассасаларининг педагог ва бошқа ходимлари Учкўприк тумани тиббиёт бирлашмасининг хўжалик ҳисобидаги пуллик хизмат бўлими томонидан тўлов асосида мажбурий тиббий кўрикдан ўтиб келган.
Меҳнат кодексининг 214-моддасига мувофиқ иш берувчи умумтаълим мактаблари, мактабгача таълим ва бошқа муассасаларнинг бевосита болаларга таълим ёки тарбия бериш билан машғул бўлган педагог ва бошқа ходимларини тиббий кўрикдан ўтказишни ташкил қилиши шартлиги, тиббий кўрикдан ўтилиши муносабати билан ходимлар чиқимдор бўлмаслиги кўрсатилган.
«Таълим тўғрисида»ги қонуннинг 45-моддасига кўра, педагог ходимлар давлат соғлиқни сақлаш муассасаларида бепул тиббий кўрикдан ўтиш ҳуқуқига эга.
Қайд этилишича, Учкўприк туманидаги 4-умумий ўрта таълим мактаби раҳбарияти 2020 йилнинг 7 октябрь куни туман тиббиёт бирлашмасига мактаб ишчи-ходимларини белгиланган тартибда бепул тиббий кўрикдан ўтказиш масаласида мурожаат қилган. Лекин туман тиббиёт бирлашмаси томонидан мактаб ишчи-ходимларини бепул тиббий текширувдан ўтказилмаган.
Мазкур ҳолат юзасидан Учкўприк тумани адлия бўлими томонидан 2020 йил 8 октябрда тиббиёт бирлашмасига тумандаги давлат таълим муассасалари ва ташкилотларининг педагог ва бошқа ходимларининг бепул тиббий кўрикдан ўтказилишини таъминлаш тўғрисида тақдимнома киритилган. Ушбу тақдимномага жавобан туман тиббиёт бирлашмаси бюджет ташкилотлари ходимларининг тиббий кўрикдан ўтиш харажатларини иш берувчи шартнома асосида пул кўчириш йўли билан қоплаши кераклиги маълум қилинган. Ваҳоланки, соғлиқни сақлаш вазирининг 2012 йилнинг 10 июлдаги буйруғи билан тасдиқланган «Ходимларни тиббий кўрикдан ўтказиш тартиби тўғрисида»ги низомда тиббий кўриклар шартнома асосида ўтказилиши кўрсатилмаган.
Суд мажлисида таъкидланишича, Учкўприк тумани тиббиёт бирлашмаси мансабдор шахслари томонидан мазкур қонун ҳужжатлари талаблари қўпол равишда бузилиб, давлат таълим муассасалари ва ташкилотлари ишчи-ходимларининг давлат соғлиқни сақлаш муассасаларида бепул тиббий кўрикдан ўтиш ҳуқуқи поймол қилинган.
Суд қарори билан жавобгар Учкўприк тумани тиббиёт бирлашмаси мансабдор шахсларининг ҳаракатлари ёки ҳаракатсизлиги қонунга хилоф деб топилиб, тиббиёт бирлашмасига 4-умумий ўрта таълим мактаби ўқитувчилари М.Қодирова, Н.Қодирова, О.Бозорова, Д.Тожиева, Д.Масолиева, З.Эрматовани белгиланган тартибда бепул тиббий кўрикдан ўтказиш мажбурияти юкланган.
Изоҳ (0)