Фуқаролардан ортиқча ҳужжат талаб қилган 10 га яқин ОТМга интизомий жазо чоралари кўрилди, дея хабар бермоқда Адлия вазирлиги.
Адлия органлари томонидан Самарқанд вилояти мисолида сўров орқали ўтказилган ўрганиш натижаларига кўра, фуқаролардан талаб қилиш тақиқланган ҳужжатлар олингани, қонун ҳужжатлари билан белгиланган талабларга зид равишда расмий ҳужжатларнинг нусхалари талаб қилингани ва бошқа бюрократик тўсиқлар мавжудлиги аниқланган.
Қайд этилишича, Самарқанд давлат чет тиллар университети абитуриентлардан фуқаролик паспортидан нусха, солиқ тўловчининг ҳисобга қўйилгани тўғрисида гувоҳнома, жисмоний шахснинг жамғариб бориладиган пенсия тизимига қўйилгани тўғрисида маълумотнома каби ҳужжатларни тақдим этишни асоссиз равишда талаб қилган.
Олий таълим муассасаси қабул комиссияси абитуриент ҳақидаги зарур маълумотларни Давлат тест марказининг махсус дастурига киритиб, абитуриентга асл ҳужжатларни қайтариши назарда тутилган.
Шунга асосан, Адлия вазирлиги томонидан олий таълим муассасалари томонидан ортиқча бюрократик ғов ва тўсиқларга барҳам бериш бўйича Олий ва ўрта махсус таълим вазирлигига тегишли тақдимнома киритилди.
Шунингдек, Олий ва ўрта махсус таълим вазирлиги томонидан мазкур қонун ҳужжатлари бузилишининг олдини олиш ва бартараф қилишга қаратилган чора-тадбирлар белгилаб олинди.
Маълум қилинишича, абитуриентлардан ортиқча ҳужжат талаб қилган 10 га яқин ОТМнинг раҳбар-ходимларига турли интизомий жазо чоралари кўрилган.
Аввалроқ Ўзбекистонда профессор-ўқитувчилар илмий салоҳияти энг юқори ва энг паст бўлган ОТМлар маълум қилинганди.
Изоҳ (0)