2020 йилнинг сентябрь ойида имзоланган янги таҳрирдаги «Таълим тўғрисида»ги қонунга асосан, бола 7 ёшга тўладиган йилда 1-синфга қабул қилинади. Бу ҳақда 3 декабрь куни Халқ таълими вазирлигида ўтказилган матбуот анжуманида таъкидланди, дея хабар бермоқда «Дарё» мухбири Миролим Исажонов.
Халқ таълими вазири ўринбосари Усмон Шарифхўжаевнинг айтишича, мазкур янги тартиб ота-оналар ва ўқитувчилар ўртасидаги тушунмовчиликларга барҳам беради.
Шу пайтгача болани неча ёшдан мактабга бериш масаласини ота-оналар ҳар хил талқин қилишади. Норматив ҳужжатларда 6-7 ёш, дейилган. Бошқа тартибда эса психолог хулосасига кўра, бола мактабга тайёр бўлса, муддатидан аввал қабул қилиниши мумкин, деган талқинлар ҳам бўлган ва бу кўплаб эътирозларни келтириб чиқарган.Бу вазиятдан кимдир ўз манфаати йўлида фойдаланиши ҳам мумкин. Шу сабабли ва халқаро тажрибадан келиб чиқиб, 6 ёшли болаларни мактабга тайёрлов мажбурий равишда қонунга киритилганини ҳам инобатга олган ҳолда 2020 йилнинг 23 сентябридан кучга кирган «Таълим тўғрисида»ги қонунда келаси ўқув йилидан бошлаб бола 7 ёшга тўладиган йилда мактабга қабул қилиш белгиланган.
Масалан, 2021 йилнинг 31 декабрига қадар 7 ёшга тўладиган бола кейинги ўқув йилидан мактабга қабул қилинади. Қонунчиликдаги бу янги тартибдан ота-оналар, албатта, хабардор бўлиши зарур. Бу эса ота-оналар ва педагоглар ўртасидаги ўзаро тушунмовчиликларга барҳам беради.
Усмон Шарифхўжаев, Халқ таълими вазири ўринбосари
Мавзуга доир:
Изоҳ (0)