Farg‘ona viloyatining Uchko‘prik tumani ma’muriy sudida hududdagi 4-maktabning olti nafar o‘qituvchisi manfaatini ko‘zlab adliya bo‘limi tomonidan kiritilgan da’vo arizasi ko‘rib chiqildi. Ma’muriy sud raisi Kamoliddin Rahimov raisligida o‘tgan sud majlisida o‘qituvchilarni tibbiy ko‘rikdan bepul o‘tkazish talabi qanoatlantirilgan. Bu haqda “Daryo” muxbiri xabar berdi.
Uchko‘prik tumani adliya bo‘limi boshlig‘i Shukurjon Xolmatovning ma’lum qilishicha, tumandagi 4-umumiy o‘rta ta’lim maktabi o‘qituvchilari — M.Qodirova, N.Qodirova, O.Bozorova, D.Tojiyeva, D.Masoliyeva, Z.Ermatovaning bepul tibbiy ko‘rikdan o‘tish huquqidan foydalanish masalasida amaliy yordam so‘rab qilgan murojaati o‘rganib chiqilgan.
Aniqlanishicha, umumiy o‘rta ta’lim va maktabgacha ta’lim muassasalarining pedagog va boshqa xodimlari Uchko‘prik tumani tibbiyot birlashmasining xo‘jalik hisobidagi pullik xizmat bo‘limi tomonidan to‘lov asosida majburiy tibbiy ko‘rikdan o‘tib kelgan.
Mehnat kodeksining 214-moddasiga muvofiq ish beruvchi umumta’lim maktablari, maktabgacha ta’lim va boshqa muassasalarning bevosita bolalarga ta’lim yoki tarbiya berish bilan mashg‘ul bo‘lgan pedagog va boshqa xodimlarini tibbiy ko‘rikdan o‘tkazishni tashkil qilishi shartligi, tibbiy ko‘rikdan o‘tilishi munosabati bilan xodimlar chiqimdor bo‘lmasligi ko‘rsatilgan.
“Ta’lim to‘g‘risida”gi qonunning 45-moddasiga ko‘ra, pedagog xodimlar davlat sog‘liqni saqlash muassasalarida bepul tibbiy ko‘rikdan o‘tish huquqiga ega.
Qayd etilishicha, Uchko‘prik tumanidagi 4-umumiy o‘rta ta’lim maktabi rahbariyati 2020-yilning 7-oktabr kuni tuman tibbiyot birlashmasiga maktab ishchi-xodimlarini belgilangan tartibda bepul tibbiy ko‘rikdan o‘tkazish masalasida murojaat qilgan. Lekin tuman tibbiyot birlashmasi tomonidan maktab ishchi-xodimlarini bepul tibbiy tekshiruvdan o‘tkazilmagan.
Mazkur holat yuzasidan Uchko‘prik tumani adliya bo‘limi tomonidan 2020-yil 8-oktabrda tibbiyot birlashmasiga tumandagi davlat ta’lim muassasalari va tashkilotlarining pedagog va boshqa xodimlarining bepul tibbiy ko‘rikdan o‘tkazilishini ta’minlash to‘g‘risida taqdimnoma kiritilgan. Ushbu taqdimnomaga javoban tuman tibbiyot birlashmasi budjet tashkilotlari xodimlarining tibbiy ko‘rikdan o‘tish xarajatlarini ish beruvchi shartnoma asosida pul ko‘chirish yo‘li bilan qoplashi kerakligi ma’lum qilingan. Vaholanki, sog‘liqni saqlash vazirining 2012-yilning 10-iyuldagi buyrug‘i bilan tasdiqlangan “Xodimlarni tibbiy ko‘rikdan o‘tkazish tartibi to‘g‘risida”gi nizomda tibbiy ko‘riklar shartnoma asosida o‘tkazilishi ko‘rsatilmagan.
Sud majlisida ta’kidlanishicha, Uchko‘prik tumani tibbiyot birlashmasi mansabdor shaxslari tomonidan mazkur qonun hujjatlari talablari qo‘pol ravishda buzilib, davlat ta’lim muassasalari va tashkilotlari ishchi-xodimlarining davlat sog‘liqni saqlash muassasalarida bepul tibbiy ko‘rikdan o‘tish huquqi poymol qilingan.
Sud qarori bilan javobgar Uchko‘prik tumani tibbiyot birlashmasi mansabdor shaxslarining harakatlari yoki harakatsizligi qonunga xilof deb topilib, tibbiyot birlashmasiga 4-umumiy o‘rta ta’lim maktabi o‘qituvchilari M.Qodirova, N.Qodirova, O.Bozorova, D.Tojiyeva, D.Masoliyeva, Z.Ermatovani belgilangan tartibda bepul tibbiy ko‘rikdan o‘tkazish majburiyati yuklangan.
Izoh (0)