Россиянинг Москва вилоятида қийин аҳволга тушиб қолиб, ўрмонда яшаётган Ўзбекистон фуқароси ва унинг етти ёшли фарзанди Тошкентга олиб келинди. Бу ҳақда Ташқи меҳнат миграцияси агентлиги хабар берди.
Агентлик томонидан маълум қилинишича, кўплаб ОАВ ва ижтимоий тармоқларда Россиянинг Москва вилоятида қийин аҳволга тушиб қолиб, ўрмонда яшаётган мазкур эркак ва унинг ўғли ҳақида хабарлар тарқалган эди.
Маълум бўлишича, 1974 йилда туғилган Ўзбекистон фуқароси Шуҳрат Жалилов узоқ йиллардан буён Россияда ишлаб келган. Унинг Украина фуқароси бўлган аёлдан 2013 йилда фарзанди туғилган. 2020 йил август ойида боланинг онаси вафот этган.
Ташқи меҳнат миграцияси агентлигининг Россиядаги ваколатхонаси, Ўзбекистоннинг Россиядаги элчихонаси, Халқаро миграция ташкилоти ҳамкорлигида мазкур фуқаро ва унинг ўғлини ватанга қайратиш билан боғлиқ барча ҳуқуқий ва ташкилий масалалар ҳал этилди.
«3 декабрь куни Москва—Тошкент рейси билан учиб келган Шуҳрат Жалилов ва унинг ўғли Амал Жалилов Тошкент халқаро аэропортида Ташқи меҳнат миграцияси агентлиги вакиллари томонидан кутиб олиниб, доимий яшаш жойига кузатиб қўйилди», — дейилади агентлик хабарида.
Аввалроқ Россияда бир неча ойдан буён ўрмонда отаси билан яшаётган Амалга туғилганлик ҳақида гувоҳнома берилгани хабар қилинганди.
Изоҳ (0)