Туризмни ривожлантириш давлат қўмитаси раиси Азиз Абдуҳакимов Ўзбекистон отелерлар Ассоциацияси аъзолари — Тошкент шаҳрининг энг йирик меҳмонхоналари эгалари ва бош менежерлари билан учрашув ўтказди. Бу ҳақда қўмита матбуот хизмати хабар берди.
Қайд этилишича, учрашувда Азиз Абдуҳакимов бугунги кунда меҳмонхоналар фаолиятини жонлантириши мумкин бўлган зиёрат туризмини ривожлантиришга оид лойиҳалар ишлаб чиқилаётганини таъкидлади.
Унинг сўзларига кўра, лойиҳа доирасида Туркия, Эрон, Ҳиндистон, Покистон ва Бангладешнинг етакчи диний арбоблари билан Ўзбекистонга янги сайёҳлар оқими ташрифини ташкил қилишга доир музокаралар ўтказилган.
Учрашув якунига кўра, меҳмондўстлик соҳаси учун имтиёз ва преференсиялар муддатини 2021 йилнинг охирига қадар узайтириш ҳамда санитар норма ва қоидаларнинг ягона тизимини тасдиқлашга оид қарор қабул қилинди.
Аввалроқ Навоийда лойиҳа қиймати 6 миллион доллар бўлган дам олиш маскани иш бошлагани, Жиззахда Президент қарори билан халқаро умуммавсумий тоғ-чанғи курорти, Хонободда минерал сув ишлаб чиқариш ва дам олиш зонаси ташкил этилиши ҳамда Тошкентнинг эски шаҳари «очиқ осмон остидаги музей»га айлантирилиши ҳақида хабар берилганди.
Изоҳ (0)