Россия илм-фан ва таълим вазирлиги мамлакатдаги олий таълим муассасаларида таҳсил олаётган хорижлик талабаларнинг масофавий таълим шаклига ўтилгани учун олийгоҳлардан четлаштирилиши ҳақида тарқалган хабарларни инкор этди, деб ёзмоқда «Интерфакс».
«Таълимнинг масофавий шаклига ўтилиши хорижлик талабаларнинг ОТМдан четлаштирилиши сабаб бўлмайди», – дея баёнот берган вазирлик.
Аввалроқ пандемия сабаб Россия чегараларининг ёпилганлиги ва бошқа мамлакатлардан келган талабалар федерацияга кира олмаётгани туфайли сафдан чиқарилиши ҳақида хабарлар тарқалганди.
«Олийгоҳлардаги бюджет ўринлари карантин чекловлари туфайли Россияга кела олмаган ва алоқа сифатининг ёмонлиги оқибатида масофадан таълим олишга қодир бўлмаган талабалар учун сақлаб турилади», – дейилади вазирлик тушунтиришида.
Бундан ташқари вазирлик томонидан хориждан мамлакатга кела олмаган талабларнинг яшаш шароитларига кўмак бериш мақсадида улар яшайдиган ҳудудлардаги олийгоҳлар филиалларида иш ўринлари ташкил қилиш масалалари ҳам ўрганилмоқда.
Шунингдек, вазирлик ўтган вақт давомида талабаларнинг дарсларда қатнаша олмаганлиги сабабли ўқишдан четлатилгани ҳақидаги шикоят ёхуд мурожаатлар келиб тушмаганини қайд этган.
Москва ва Санкт Петербургда коронавирус эпидемияси боғлиқ нохуш вазият туфайли 13 ноябрдан бошлаб таълимнинг масофавий шаклига ўтилган. Россия ОТМларида таҳсил олаётган хорижлик талабалар баҳорда юртига кетганидан кейин, чегаралар қайта ёпилганлиги сабабли мамлакат ҳудудига кира олмаган. Вазирлик хорижликлар учун масофавий технологиялар асосида ўқитиш ташкил қилинишини билдирган.
2020 йил 29 ноябрь ҳолатига кўра бутун дунёда коронавирусга чалинганлар сони 62 миллиондан ошган, пандемия бошидан буён 1,4 миллион киши коронавирусдан вафот этган. Россияда 27 ноябрда бир суткада 27 543 кишида COVID-19 аниқланган, бир кун аввал 26 ноябрь куни 25 487 кишида коронавирус аниқланиб, кунлик касалланишлар сони бўйича юқори кўрсаткич қайд этилганди.
Изоҳ (0)