Озарбайжон армияси Тоғли Қорабоғдаги Келбажар туманига кирди, деб ёзади «РБК» мамлакат мудофаа вазирлигига таяниб.
«Озарбайжон армияси бўлинмалари 25 ноябрь куни Келбажар туманига кирди», — дейилади хабарда.
Идора аниқлик киритишича, қўшинларни шу томонга йўналтириш учун муҳандислик ишлари олиб борилган. Ҳозир миналардан тозалаш ишлари ўтказилмоқда ва ўтиш қийин бўлган тоғ йўллари тайёрланмоқда.
Келбажар тумани 25 ноябрь куни Озарбайжон назорати остига ўтди. Бу Боку, Ереван ва Москва ўртасида Тоғли Қорабоғда ўт очишни тўхтатиш ҳақидаги уч томонлама келишувга мувофиқ содир бўлди. Аввалроқ Арманистон ҳарбийлари ушбу тумандан ўз бўлинмаларини олиб чиқиб кетишни якунлаган эди.
Эсатиб ўтамиз, Тоғли Қорабоғда Озарбайжон ва Арманистон ўртасидаги жанговор ҳаракатлар 27 сентябрь куни қайта бошланганди. Иккала давлат ҳам ҳарбий ҳолат жорий қилди ва бир-бирини тинч аҳолига қарши ҳужумларда айблади. Қурбонлар ҳам ҳарбий хизматчилар, ҳам оддий одамлар бўлди. 9 октябрда Москвада зиддиятли томонларнинг вакиллари билан музокаралар олиб борилди, натижада жанговор ҳаракатларни тўхтатиш тўғрисида қарор қабул қилинди. Ўт очишни тўхтатиш 10 октябрь куни эрталаб кучга кирди.
Илҳом Алиев, Арманистон бош вазири Никол Пашинян ва Россия президенти Владимир Путин ўртасида 10 ноябрда имзоланган келишувга мувофиқ, Озарбайжон ҳарбий ҳаракатлар пайтида босиб олинган ҳудудни ҳам, 1990 йилларнинг бошларида қўлдан чиқарилган Лачин, Агдам ва Келбажар туманларидаги аҳоли пунктларини ҳам олади. Шу жумладан, стратегик жиҳатдан муҳим Шуша шаҳри Озарбайжонга ўтади.
Арманистон Қуролли кучлари ўз позицияларидан олиб чиқилмоқда, минтақага 2 мингга яқин рус тинчликпарвари техника билан олиб келинмоқда. Арманистонга Қорабоғга транспорт йўлаги яратилиши кафолатланади, шу билан бир вақтда Озарбайжондан Нахичеван эксклавигача транспорт йўлаги яратилади.
Изоҳ (0)