Ozarbayjon armiyasi Tog‘li Qorabog‘dagi Kelbajar tumaniga kirdi, deb yozadi “RBK” mamlakat mudofaa vazirligiga tayanib.
“Ozarbayjon armiyasi bo‘linmalari 25-noyabr kuni Kelbajar tumaniga kirdi”, — deyiladi xabarda.
Idora aniqlik kiritishicha, qo‘shinlarni shu tomonga yo‘naltirish uchun muhandislik ishlari olib borilgan. Hozir minalardan tozalash ishlari o‘tkazilmoqda va o‘tish qiyin bo‘lgan tog‘ yo‘llari tayyorlanmoqda.
Kelbajar tumani 25-noyabr kuni Ozarbayjon nazorati ostiga o‘tdi. Bu Boku, Yerevan va Moskva o‘rtasida Tog‘li Qorabog‘da o‘t ochishni to‘xtatish haqidagi uch tomonlama kelishuvga muvofiq sodir bo‘ldi. Avvalroq Armaniston harbiylari ushbu tumandan o‘z bo‘linmalarini olib chiqib ketishni yakunlagan edi.
Esatib o‘tamiz, Tog‘li Qorabog‘da Ozarbayjon va Armaniston o‘rtasidagi jangovor harakatlar 27-sentabr kuni qayta boshlangandi. Ikkala davlat ham harbiy holat joriy qildi va bir-birini tinch aholiga qarshi hujumlarda aybladi. Qurbonlar ham harbiy xizmatchilar, ham oddiy odamlar bo‘ldi. 9-oktabrda Moskvada ziddiyatli tomonlarning vakillari bilan muzokaralar olib borildi, natijada jangovor harakatlarni to‘xtatish to‘g‘risida qaror qabul qilindi. O‘t ochishni to‘xtatish 10-oktabr kuni ertalab kuchga kirdi.
Ilhom Aliyev, Armaniston bosh vaziri Nikol Pashinyan va Rossiya prezidenti Vladimir Putin o‘rtasida 10-noyabrda imzolangan kelishuvga muvofiq, Ozarbayjon harbiy harakatlar paytida bosib olingan hududni ham, 1990-yillarning boshlarida qo‘ldan chiqarilgan Lachin, Agdam va Kelbajar tumanlaridagi aholi punktlarini ham oladi. Shu jumladan, strategik jihatdan muhim Shusha shahri Ozarbayjonga o‘tadi.
Armaniston Qurolli kuchlari o‘z pozitsiyalaridan olib chiqilmoqda, mintaqaga 2 mingga yaqin rus tinchlikparvari texnika bilan olib kelinmoqda. Armanistonga Qorabog‘ga transport yo‘lagi yaratilishi kafolatlanadi, shu bilan bir vaqtda Ozarbayjondan Naxichevan eksklavigacha transport yo‘lagi yaratiladi.
Izoh (0)