Оқ уй Американинг кўплаб ОАВлари томонидан АҚШнинг сайланган президенти дея эътироф этилаётган демократ Жозеф Байденга разведка томонидан давлат раҳбари учун тайёрланадиган кунлик махфий ҳисоботларни тақдим этишга рухсат берди, деб ёзади «РБК».
Reuters амалдаги маъмуриятдаги манбаларига таяниб маълум қилишича, энди Байден АҚШ миллий хавфсизлигига нисбатан хатарларга оид сўнгги разведка маълумотлари билан танишиб бориши мумкин бўлади.
Кейинроқ Байденнинг ўзи бу маълумотни тасдиқлади. У ҳисоботларни доимий равишда қабул қилиб туришини айтди. Собиқ вице-президент таъкидлашича, амалдаги маъмурият ходимлари «очиқкўнгиллилик қилиб, маълумотлардан тўлиқ фойдаланиш имкониятини таклиф этган».
Аввалроқ Дональд Трамп маъмурияти Жо Байденга ҳокимиятни топширишга тайёрлигини билдирган эди. АҚШ умумий хизматлар бошқармаси директори Эмили Мёрфий сайловлардан кейин уч ҳафта ўтиб, демократнинг ғалабасини тан олди ҳамда у қонунга ва мавжуд фактларга асосланган ҳолда бундай қарорга мустақил равишда келганлигини айтди.
Шунингдек, у АҚШ маъмуриятининг умумий масалалар бўйича бошқармаси Байденга мамлакатда ҳокимиятни топшириш жараёнини бошлаш учун зарур бўлган молиявий маблағлардан фойдаланиш имкониятини тақдим этган. Мёрфининг сўзларига кўра, Байденнинг штаби ҳозир тахминан 7,3 миллион доллардан фойдаланиши мумкин.
Амалдаги АҚШ президенти Дональд Трамп бу маълумотга изоҳ берар экан, Мёрфига ва ўз маъмурияти аъзоларига ҳокимиятни топшириш масаласида «зарур бўлган нарсаларни қилиш»ни тавсия этди. Аммо у сайловлардаги мағлубиятини тан олмасдан, бир қатор штатларда сайловлар натижалари юзасидан суд тортишувларини давом эттириш ниятини маълум қилди.
Эслатиб ўтамиз, АҚШда президентлик сайлови 2020 йилнинг 3 ноябрь куни бўлиб ўтди, овозлар бир неча кун давомида ҳисоблаб чиқилди, 7 ноябрь куни АҚШнинг йирик ОАВлари сайловда Байден ғалаба қозонганини маълум қилди. Дональд Трамп эса мағлубиятни тан олмади ва сайлов бўйича судга мурожаат қилишини билдирди. У сайловлар қонунбузарликлар билан ўтган деган фикрда, шунингдек, сайловларда мамлакат конституцияси бузилганини айтган.
Изоҳ (0)