Исроил бош вазири Бинямин Нетаньяху ҳамда Абу-Даби валиаҳд шаҳзодаси Муҳаммад ибн Зайд ал-Наҳаён Британия лордлар палатаси аъзоси Уильям Дэвид Тримбл томонидан Тинчлик бўйича бериладиган Нобель мукофотига номзодлар сифатида кўрсатилди. Бу ҳақда Jerusalem Post хабар тарқатган.
Нашрнинг ёзишича, давлатлар раҳбарлари ўзаро тинчлик шартномасини имзолагани туфайли мукофотга номзод сифатида қайд этилган. Икки давлат ўртасидаги келишув Исроил ва Араб мамлакатлари ўртасидаги муносабатларнинг меъёрлашувига хизмат қилган.
Асли шимолий ирландиялик Тримбл 1998 йилда Шимолий Ирландиядаги низони ҳал этишдаги ҳаракатлари сабаб Нобель мукофоти соҳиби бўлганди. Нетаньяху идораси Нобель қўмитасининг ушбу номинация номзодларини ўрганиб чиқишига ишонмоқда.
Агар исроиллик сиёсатчи мукофотни қўлга киритса, у мамлакат тарихида Нобель мукофотини олган тўртинчи тарихий шахсга айланади. Нобель мукофоти 1901 йилдан бери топшириб келинади.
Сентябрь ўрталарида Вашингтонда Исроилнинг Баҳрайн ва БАА давлатлари билан муосабатларини нормаллаштириш юзасидан келишув имзоланган. Кейинчалик Исроил ҳамда БАА ушбу шартномани ратификация қилган.
Бунгача Исроил фақат икки араб давлати – 1979 йилда Миср ҳамда 1994 йилдан Иордания билан халқаро муносабатларни ўрнатган эди.1978 йилда ўша вақтдаги Миср президенти Анвар Садат ва Исроил бош вазири Менахем Бегин ўзаро муносабатларни ўрнатгани, ҳамкорлик юзасидан келишув имзолагани туфайли Тинчлик йўналишидаги Нобель мукофотига сазовор бўлган.
Изоҳ (0)