«Истеъмолчилар эътирози сабаб МИБ ходимларига нисбатан хизмат текшируви ўтказилади» — Ҳудудий электр тармоқлари

«Ҳудудий электр тармоқлари» АЖ фаолиятида электр энергиясини ҳисобга олиш ва назорат қилишнинг автоматлаштирилган тизими (АСКУЭ) йўлга қўйилгач етказиб берилган электр энергияси бўйича пул тушуми сентябрь ойида 107 фоизга бажарилган. Бу ҳақда 24 ноябрь куни «Ҳудудий электр тармоқлари» АЖ томонидан ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.

«Электр энергияси бўйича тўлов ва қарздорликларни ундиришда Мажбурий ижро бюроси ўзига яраша ишларни амалга оширди. Ушбу ваколат МИБга ўтмасдан аввал энергетика соҳасида ойликлар уч, тўрт ойлаб берилмас эди, солиқдан ҳар ойда қарздор бўлардик, тўлай олмасдик. Бу ташкилот билан бирга ишлаганимиздан кейин маблағ кўп тушишни бошлади, маошларни ойма-ой тўлашга ўтдик ва солиқларни ҳам ўз вақтида тўлашни бошладик. Лекин МИБ бу ишларни маълум ҳақ эвазига қиларди: тушган маблағдан 10 фоизини ўзига оларди. АСКУЭ тизими жорий этилгач МИБнинг ваколати яна ўзимизга қайтариб берилди, яъни ташкилот пул йиғиш жараёнидан чиқиб кетди. 2020 йилнинг август ойидан бошлаб пул йиғими яна ‘Ҳудудий электр тармоқлари’ АЖ ваколатига ўтди. МИБ пул йиғиш жараёнида иштирок этмайди, фақат ижро билан шуғулланади. Сентябрь ойи якунига кўра, ташкилотимиз етказиб берилган электр энергияси бўйича пул тушумини 107 фоизга бажарди. Октябрь ойида ҳам 100 фоиздан юқорилади», — деди «Ҳудудий электр тармоқлари» АЖ бошқарув раисининг биринчи ўринбосари Жаҳонгир Обиджонов.

Унинг айтишича, истеъмолчилар эътирози туфайли МИБ ходимларига нисбатан хизмат текшируви ўтказилиши кутилмоқда.

«АСКУЭ тизими йўлга қўйилганидан сўнг туманлар, чекка ҳудудларга чиқиб, аҳоли билан ишлашни бошладик. Мулоқотлар жараёнида истеъмолчиларда қарздорликка оид турли тушунмовчиликлар юзага келаётганининг гувоҳи бўлдик. Улар ‘МИБга тўлов қилгандим, сизларнинг базангизда кўринмабди. Қўлимда тўлов қилганим ҳақида қоғоз бор, нима учун бундай ҳолат бўлган’, дея ҳақли саволлар билан мурожаат қилишди. МИБга маблағни тўлаганидан сўнг у пул бизнинг ҳисобрақамимизга тушиши керак. Яъни ишлатган электр энергиясига тўлов қилгач қарздорлик камайиши лозим. Ҳақиқатан, ўша пайтда МИБга қилинган тўлов бизнинг базага келиб тушмаганлиги аниқланяпти. Натижада истеъмолчиларда бизга нисбатан эътирозлар пайдо бўлмоқда.

Шуни алоҳида айтиш керакки, бу каби ҳолатлар жуда кўп учраётганлиги туфайли Мажбурий ижро бюроси директори Ҳасан ака Кабиржонов билан гаплашдик. Тўловларни йиғиш ваколати МИБда бўлган даврда аҳолидан пулни олган, аммо кирим қилмаган МИБ ходимлари устидан хизмат текшируви ўтказилиши ва бу иш охирига етказилишига келишдик. Жабр кўрган истеъмолчилар рўйхатини шакллантириб, туман ва республика МИБга тақдим этадиган бўлдик. Бу масала оператив равишда ҳал этилиши режалаштирилди. Якуний натижанинг қандайлигини хизмат текширувидан кейин биламиз», — деди Обиджонов.