Тан олинмаган Тоғли Қорабоғнинг ҳудуди ва унга ёндош барча туманлар «халқаро ҳуқуқ нуқтаи назаридан» Озарбайжонга тегишли, чунки Арманистон ушбу ҳудудларнинг мустақиллигини тан олмаган. Бу каби фикрни Россия президенти Владимир Путин «Москва. Кремль. Путин» дастурининг эфири давомида билдириб ўтди, деб хабар беради «РБК».
«Ахир Арманистон Тоғли Қорабоғнинг мустақиллиги ва суверенитетини тан олмаган. Бу эса халқаро ҳуқуқ нуқтаи назаридан Тоғли Қорабоғ ва унинг атрофидаги барча туманлар Озарбайжоннинг ажралмас қисми эканлигини билдирган ва билдиради», — дейди Россия президенти.
Бироқ Путиннинг таъкидлашича, ҳудуднинг якуний мақоми ҳали белгиланмаган. «Биз кво-мақомини (урушдан олдинги ҳолати — таҳр.) сақлаб қолишга келишиб олдик. Кейинчалик нима бўлиши энди ҳал этилади ёки ушбу жараённинг келажакдаги иштирокчилари, раҳбарлари ҳал этиши керак», — дея қўшимча қилади Путин.
Путиннинг сўзларига кўра, Коллектив хавфсизлик тўғрисидаги шартнома ташкилотига аъзолик шартида Россиянинг ушбу можарога аралашиши кўзда тутилмаган. Шартномада ушбу шартномага аъзо-давлатга тажовуз қилинганида ўзаро ёрдам кўрсатиш белгиланган. Путиннинг таъкидлашича, Арманистон ҳудудида ҳеч ким ҳужум уюштирмаган, шу сабабли Россиянинг жанговар ҳаракатларда иштирок этишига ҳеч қандай ҳуқуқ берилмаган.
Шу билан бирга, Путиннинг айтишича, Москва Ереван билан ҳарбий-техник ҳамкорлик доирасидаги барча мажбуриятларини тўлиқ бажарган.
Эслатиб ўтaмиз, Россия иштирокидаги музокаралар натижасига кўра, низо томонлари ўт очишни тўхтатишга қарор қилди. 10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади. Шундан сўнг Арманистонда ушбу битим сабаб норозилик намойишлари бошланди ва у икки ҳафтадан буён давом этмоқда. Битимга кўра, Озарбайжон минтақа ҳудудининг катта қисмини олган. Мухолифат Пашинян «хоинлик» шартнома имзолангани сабабли истеъфога чиқишини талаб қилмоқда.
Изоҳ (0)